Respıratorlyq vırýstan qorǵanýdyń 5 qaǵıdasy qandaı
«Infektsıonıst retinde respıratorlyq vırýstan qorǵanýdyń 5 mańyzdy qaǵıdasyn ustanýǵa keńes beremin. Eń aldymen – halyq kóp jınalatyn oryndarǵa barmańyz. Ekinshiden – JRVI belgileri bar adamdarmen baılanyspaý jáne qoldy jıi sabyndap jýý. Úshinshiden – qoǵamdyq oryndarda betperdemen júrý. Ár 2-3 saǵatta betperdeni aýystyrý. Tórtinshi – túshkirgende qaǵaz maılyqtardy qoldanyp, eńkeıý qajet. Besinshi – et ónimderin qaınatyp, qýyryp, kókónisterdi ystyq shýmen shaıý kerek. Bazarda qurǵaq jemisterdiń dámin kórmeńiz», - dedi dáriger Qazmedıa ortalyǵynda ótken brıfıngide.
Onyń aıtýynsha, Dúnıejúzilik densaýlyq saqtaý uıymy usynǵan barlyq preparattar Qazaqstanda bar.
«Qazaqstannyń Densaýlyq saqtaý mınıstrligi tolyǵymen ashyq. Alǵash ret jańa vırýs týraly otandastarymyzǵa 6 qańtarda eskertý jasaǵan edik. 7 qańtarda bul vırýs rastaldy. Halyqqa jalǵan aqparat taratpaǵany úshin alǵys aıtqymyz keledi. Keshegi túnnen búginge deıin birde-bir feık taralǵan joq. Jýrnalıster men blogerlerden aqparatty burmalamaýdy, kezdeısoq adamdardan suhbat almaýdy jáne jaýapkershilikpen qaraýdy suraımyz», - dedi D. Baesheva.
Aıta keteıik, 6 qańtardan bastap Qytaıdan Qazaqstanǵa kelgenderdiń densaýlyǵyn baqylaý jumystary jalǵasýda. 31 qańtardaǵy jaǵdaı boıynsha, Qytaıdan kelgen 66 turǵyn dene qyzýymen jáne JRVI shaǵymymen oqshaýlanyp, aýrýhanalarǵa jatqyzyldy.
Ázirge 25 adam statsıonardan shyǵaryldy, 41 adam aýrýhanada qaldy.