Resmı tabysy joq qazaqstandyqtar ıpotekany qalaı rásimdeı alady
ASTANA. KAZINFORM — Bul saýalǵa Jibek Joly telearnasynyń «Búgin Live» baǵdarlamasynda turǵyn úı sarapshysy Tolǵanaı Baesheva jaýap berdi.
Onyń aıtýynsha, 2027 jyldyń aqpanynan bastap tabys kózin rastaý talaptarynyń kúsheıýine baılanysty resmı jumysy joq azamattarǵa ıpoteka rásimdeý qıyndaıtyn bolady.
— Ipotekany tabys kózin rastamaı alý aldaǵy jyldyń aqpan aıynan bastap qıyndaıdy. Al bıylsha olar úshin eshqandaı ózgeris joq. Máselen, siz frılanser bolsańyz, ıaǵnı resmı tabysyńyz joq bolsa, esepshotyńyzǵa turaqty túrde túsetin aýdarymdardy kórsetip, sol tabystaryńyzdy dáleldeý arqyly ıpoteka rásimdeýge múmkindik bar, — dedi Tolǵanaı Baesheva.
Sarapshynyń aıtýynsha, bank azamattyń tek resmı jalaqysyna ǵana emes, shottaǵy turaqty aqsha túsimderine de nazar aýdarady.
Sondyqtan beıresmı tabys tabatyn azamattarǵa barlyq qarjylyq operatsııasyn ashyq júrgizip, tabysynyń turaqtylyǵyn dáleldeı alýy mańyzdy.
Onyń pikirinshe, resmı jumysy joq azamattar úshin ıpoteka alý múmkindigi saqtalǵanymen, tabysty rastaýǵa qoıylatyn talaptar aldaǵy ýaqytta kúsheıedi.
Aıta keteıik, Qazaqstanda jeńildetilgen ıpotekanyń úlesi 85%-ǵa jetti.
