Resmı statıstıka xalyqqa qoljetimdi bola tústi - Á. Smaılov
ASTANA. QazAqparat - Sońǵy jyldary resmı statıstıka xalyq úshin qoljetimdi bola tústi. Bul týraly QR Ulttyq ekonomıka mınıstrligi Statıstıka komıtetiniń tóraǵasy Álıxan Smaılov málim etti.
«Aqparattyq texnologııalar salasynda ınnovatsııalardyń engizilýi arqasynda memlekettik statıstıkany qoldaný deńgeıi artty. Bıyl on aı ishinde statkomıtet saıtyn 3 mıllıon adam paıdalanǵan. Bul 2009 jylmen salystyrǵanda 30 ese kóp. Basqasha aıtqanda, resmı statıstıka xalyqqa, bızneske, qoǵamǵa áldeqaıda qoljetimdi bola tústi», - dep atap ótti ol Qazaqstan statıstıkasyna 95 jyl tolýyna oraı ótkizilgen xalyqaralyq konferentsııada.
Onyń aıtýynsha, vedomstvo aqparatty óńdeý men ornalastyrýdyń biryńǵaı «E-statıstıka» avtomattandyrylǵan júıesin engizdi.
«E-statıstıka» aqparattyq júıesi 15 aqparattyq júıeniń basyn qosyp otyr. Ol bıyl 1 qańtardan bastap, aqparattyq qaýipsizdik boıynsha ótkizilgen attestatsııanyń barlyq satylary júrgizilip bitkennen soń tolyq paıdalanýǵa berildi. Júıe kez kelgen ýaqytta ózgerister engizip, respondentterden onlaın ádispen statıstıkalyq esepterdi jınaqtaıdy, óńdeıdi, saqtaıdy jáne statkomıtettiń saıtynan ony barlyq azamattarǵa qoljetimdi ete alady.
Eske sala keteıik, 8 qarasha kúni Qazaqstannyń memlekettik statıstıkasyna 95 jyl tolady. 1920 jyly dál sol kúni Qazaq AKSR Úkimeti Qazaq AKSR memlekettik statıstıkasyn qurý týraly buıryq shyǵarady. Osylaısha, Qazaqstannyń ortalyqtandyrylǵan memlekettik statıstıkasynyń irgesi qalanady.
