Resmı statıstıka azyq-túlik 3,8 paıyzǵa qymbattaǵanyn kórsetse, naqty jaǵdaı buny 10 paıyzǵa jetkizedi - depýtat
ASTANA. 11 jeltoqsan. QazAqparat - Resmı statıstıkalyq málimetter boıynsha jyl basynan beri azyq-túlik taýarlaryna baǵa 3,8 paıyzǵa artqan.
Búgin Parlament Májilisinde elimizdegi azyq-túlik ónimderiniń baǵasyn retteý máselelerin talqylaý barysynda depýtat Ýálıhan Bıshimbaev osylaı málim etti.
«Bul rette azyq-túlik emes taýarlar baǵasy - 2,8 paıyzǵa, aqyly qyzmetter 7,5 paıyzǵa artqan. Kórsetkishter ynsapty da sekildi. Alaıda sońǵy aılardaǵy naqty saýdadaǵy, bazardaǵy baǵalardy bilgen saıyn buǵan kúmánmen qaraýǵa týra keledi», - deıdi Ý. Bıshimbaev.
Depýtattyń sózine qaraǵanda, sońǵy aılardyń ózinde et 2,5-3 myń teńgege deıin ósken. «Qymbattaý azyq-túlik ónimderiniń barlyq túrlerin qamtydy. Baǵa eń kemi 10 paıyzǵa artyp otyr. Endeshe bundaı baǵanyń ósimi jaǵdaıynda tabysy kúnkóres sebetinen de tómen azamattar qalaı jan baǵady?», - dedi depýtat.
