Resmı derekter Qytaı porttarynan shyǵarylǵan júktiń kólemi azaımaǵanyn kórsetti

ASTANA. KAZINFORM – AQSh-pen saýda soǵysy Qytaı ekonomıkasyn keri ketirýi múmkin degen boljam jasalǵanyna qaramastan, sáýir aıyndaǵy resmı málimetter eldegi porttardan shet elderge jóneltilgen taýardyń naqty kólemi ózgerissiz qalǵanyn kórsetip otyr. Bul jaıynda Lianhe Zaobao basylymy habarlady.

Qytaıdyń Kólik mınıstrligi 6 mamyrda jarııalaǵan derekterge sáıkes, 27 sáýirge deıingi bir apta ishinde eldegi porttar 6,7 mıllıon konteıner jóneltken. Bul kórsetkish byltyrǵy sáıkes kezeńmen salystyrǵanda 7 paıyzǵa artyq.

Sıngapýrlyq basylymnyń jazýynsha, Qytaıdyń syrtqy saýda tasymalynyń basym bóligi teńiz arqyly júzege asyrylady, demek, bul kórsetkishter alda jarııalanatyn sáýir aıynyń eksporttyq derekteri de turaqty bolatynyn meńzeıdi.

Sáýir aıynda Qytaıdyń áýe tasymaly da aıtarlyqtaı turaqtylyq baıqatqan. Resmı derekke sáıkes, 27 sáýirge deıingi tórt apta ishinde halyqaralyq júk reısteriniń sany ótken jyldyń sáıkes kezeńimen salystyrǵanda 30%-ǵa ósken. Bul ósim Shein jáne Temu sııaqty elektrondyq saýda platformalarynyń satý kóleminiń kúrt artýymen baılanysty bolýy múmkin. Atalǵan platformalar shaǵyn sálemdemelerge arnalǵan salyqtyq jeńildik aıaqtalǵan 2 mamyrǵa deıin óz taýarlaryn syrtqa belsendi túrde jóneltken edi.

Bloomberg sarapshylarynyń pikirine súıengen basylym sáýir aıynda Qytaı eksportynyń kólemi byltyrǵy sáıkes mezgilmen salystyrǵanda 2,5%-ǵa ósken dep boljaıdy. Bul naýryz aıyndaǵy 12 paıyzdyq ósimnen áldeqaıda báseń bolǵanymen, AQSh kedendik salyqty kúrt molaıtqan kúrdeli kezeńde kóńil kónshitpeıtin nátıje emes.

Alaıda, eki el arasyndaǵy naqty saýda aınalymynyń azaıyp kele jatqany anyq bilinedi. Basylymnyń jazýynsha, sońǵy derekterge sáıkes, Qytaı porttaryna aıaldap, sosyn AQSh-qa qaraı jol tartqan júk kemeleriniń sany sáýir aıynyń ortasyndaǵy 73-ten sońǵy kúnderi 47-ge deıin azaıǵan.

Basylym sondaı-aq teńiz jáne áýe tasymaly jónindegi resmı derekterdiń mejeli ýaqyttan shamamen bir aptadaı kesh jarııalanǵanyna da nazar aýdarypty.

Eske salsaq, AQSh Qytaıdan quny 800 dollardan az shaǵyn sálemdemelerdiń baj salyǵynsyz ákelinýin toqtatqan bolatyn.