Resmı Damask oppozıtsııamen soǵysty toqtatý jáne tutqyndardy almastyrý máselesin talqylaýǵa daıyn
ASTANA. 24 qańtar. QazAqparat - Sırııanyń úkimettik delegatsııasy oppozıtsııamen soǵysty toqtatý jáne tutqyndardy almastyrýdy qosa alǵanda barlyq máselelerdi talqylaýǵa daıyn. Reseıdiń «Jańalyqtar» aqparat agenttiginiń habarlaýynsha, bul jaıynda búgin Sırııa Syrtqy ister mınıstriniń birinshi orynbasary Feısal Mıkdad jýrnalısterge málim etken.
«Biz barlyq máselelerdi, onyń ishinde soǵysty toqtatý, áskerı tutqyndardy almastyrýdy talqylaýǵa daıyn boldyq», - dedi ol.
F.Mıkdadtyń atap ótýinshe, búgin saǵat 11:00-de Sırııanyń úkimettik delegatsııasy oppozıtsııamen kelissózder ústeline otyrýǵa daıyn boldy. Alaıda ekinshi taraptyń kinásinen josparlanǵan shara oryndalmaı qaldy.
«Biz Brahımı (BUU men Arab memleketteri lıgasynyń arnaıy ókili Lahdar Brahımı) «jumystar aıaqtaldy», degenshe Jenevada qalýǵa daıynbyz», - dedi ol.
