Resmı ashylýy ótpedi: jańarǵan Saıran kólinde qandaı jumystar qaldy

ALMATY. KAZINFORM — Almatyda Saıran kóliniń jaǵasyn abattandyrý jumystary áli de júrip jatyr.

Jańarǵan Saıran kóli qazirdiń ózinde almatylyqtardyń súıikti ornyna aınalyp úlgerdi. Munda ásirese, keshkisin demalýǵa keletin adamdardyń qarasy kóp.

Degenmen, kóldiń aınalasynda áli de abattandyrý jumystary júrip jatyr. Kazinform saýalyna jaýap bergen Almaty ákimdigi nysannyń 90 paıyzǵa daıyn ekenin habarlady.

— Qazirgi ýaqytta aýmaqty abattandyrý boıynsha sońǵy jumystar júrgizilip jatyr. Sonyń ishinde: iske qosý-baptaý is-sharalary, avtomatty sýarý júıesine qosymsha jabdyqtardy ornatý, jasyl jelekterdi otyrǵyzý, ınjenerlik jelilerdi qosý jáne t. b. Keıbir ýchaskelerde syrtqy jaryqtandyrý jelilerin ornatý boıynsha qosymsha jumystar istelip jatyr. Sondaı-aq, qosymsha baspaldaq alańdarynda kóterý mehanızmderin ornatý jumystary jalǵasady, — dep habarlady ákimdikten.

Qala basshylyǵy bul jumystar tolyq aıaqtalǵannan keıin ǵana jańǵyrtýdan ótken Saıran kóliniń resmı ashylýy bolatynyn atap ótti.

Buǵan deıin Almaty ákimdigi Saıran kólindegi jumystardy keshiktirgen merdigerdi sotqa berdi.

— Búgingi tańda shart boıynsha mindetterdiń ýaqtyly ári sapaly oryndalmaýyna baılanysty qoǵamdyq keńistikterdi damytý basqarmasy «Pavlodarskıı rechnoı port» aktsıonerlik qoǵamyn memlekettik satyp alýdyń josyqsyz qatysýshysy dep taný týraly sotqa talap aryz berdi, — dep málimdedi qala ákimdigi.

Eske salaıyq, 2023 jyly Saıran sý qoımasynyń túbi 50 jylda alǵash ret tazartyldy. Mehanıkalyq tazalaý nátıjelerine 142 myń tekshe metr laı jáne 23 tonna turmystyq qoqys shyǵaryldy.