Reseımen júrgizilgen kelissózderdiń nátıjesinde Qazaqstan elimizge jeńil avtomobılder ákelgen kezde Belarýsta qoldanylatyn rejimge uqsas jeńildikti rejimdi qoldanýǵa qol jetkizdi

Bul týraly búgin Úkimet otyrysynda Premer-Mınıstr Kárim Másimov málim etti, dep habarlaıdy QazAqparat.

«Bizdiń azamattarymyz jeńil avtomobılderdi ákelgen kezde kedendik bajdar elimiz úshin mańyzdy másele bolyp tabylatyny ózderińizge belgili. Osy ýaqytqa deıin Qazaqstan zańnamasynda da, Keden odaǵynyń zańnamasynda da jeke tulǵalardyń avtomobılderdi ákelýiniń erekshe tártibi bolǵan joq, úshinshi elden avtomobıl ákelgen kezde bajdar jalpy tártippen Biryńǵaı kedendik tarıf boıynsha tólendi. Kelissózder nátıjesinde biz Qazaqstan úshin ǵana alymdar engizýge kelistik. Oǵan sáıkes Qazaqstan halqy úshin jeńil avtomobılder ákelgen kezde Belarýsta qoldanylatyn rejimge uqsas jeńildikti rejim qoldanylatyn bolady», dedi Premer-Mınıstr.

Onyń sózine qaraǵanda, rejim qozǵaltqysh kólemi men shyǵarylǵan jylyna baılanysty qubylmaly stavkalardy boljaıdy jáne 3 jyldan 10 jylǵa deıingi avtomobılder úshin barynsha jeńildikti stavkalardy belgileıdi.

«Bul rejim boıynsha biz de birqatar shekteýler engizetin bolamyz. Bul Reseı Fedaeratsııasynyń aýmaǵyna avtomobılderdi qaıta satý maqsatynda paıdalanýǵa jol bermeý. Óıtkeni, Reseı azamattary úshin neǵurlym joǵary stavka qoldanylatyn bolady», dedi K. Másimov.

Úkimet basshysynyń aıtýynsha, budan basqa, kúntizbelik bir jyl ishinde bir jeke tulǵa eki nemese odan da kóp avtomobıl ákeletin bolsa, baj stavkalary joǵary bolady.