Reseımen shekaralas oblystarda bıdaıdy zańsyz tasymaldaý áreketteri baıqalǵan
«Sońǵy birneshe jyl boıy Pavlodar oblysy zańsyz astyqty qabyldaý jáne tranzıtteý boıynsha kósh bastap tur. Qazirgi marketıngtik maýsymda Pavlodar oblysynan basqa, Reseımen shekaralas Aqtóbe jáne Batys Qazaqstan oblystaryna da bıdaı kóptep jetkizilgen. Mysaly, Pavlodar oblysy boıynsha Qarjy monıtorıngi agenttiginiń departamenti 2021-2022 jyldary Ózbekstanǵa, Aýǵanstanǵa jáne Tájikstanǵa 1 mıllıard teńgeden astam somaǵa 8,3 myń tonna reseılik kontrabandalyq astyqty eksporttaǵan JShS-ny anyqtady», - dedi E. Tasjúrekov Ortalyq kommýnıkatsııalar qyzmetinde.
Onyń aıtýynsha, taǵy bir qazaqstandyq kompanııa jeńildetilgen eksporttyq tarıfti alý úshin otandyq sharýa qojalyqtarynyń jalǵan shot-faktýralaryn paıdalanǵan, bul tranzıttik tarıften jaltarýǵa múmkindik bergen jáne «QTJ - Júk tasymaly» JShS-ne 150 mıllıon teńgege jýyq zalal keltirgen.
Aqtóbe men Batys Qazaqstan oblystaryna qatysty vıtse-mınıstr bul óńirler buryn-sońdy dándi daqyl ósirmegenin, óıtkeni el batysynda ortasha ónimdilik gektaryna 8 tsentnerden aspaıtynyn aıtty.
«Onda jınalǵan ónim ishki tutynýǵa qaldyrylatyn, onyń ishinde tuqym maqsattary úshin jetispeıtin kólemder soltústikten satyp alynatyn. Endi, kenetten atalǵan óńirlerde eksporttyq áleýet paıda bolyp, respýblıkanyń basqa óńirlerine astyq donorlary bolyp otyr», - deıdi vıtse-mınıstr.
Buǵan deıin Erbol Tasjúrekov Qazaqstanǵa avtokólikpen bıdaı ákelýge nege tyıym salynǵanyn túsindirgen edi.
10 sáýirde Aýyl sharýashylyǵy mınıstriniń «QR aýmaǵyna bıdaıdy avtomobıl kóligimen ákelýge tyıym salýdy engizý týraly» buıyryǵy kúshine endi.
