Reseımen shekaralas aımaqtarda órt qaýpin joqqa shyǵarýǵa bolmaıdy – Úkimet basshysy
ASTANA. KAZINFORM – Reseımen shekaralas aımaqtarda órt qaýpin joqqa shyǵarýǵa bolmaıdy. Bul týraly Úkimet otyrysynda Premer-Mınıstr Oljas Bektenov aıtty.
«Transshekaralyq órtterdiń týyndaý qaýipine de mán berý kerek. Búgingi tańda Reseımen shekaralas aımaqtarda órt oshaqtary tirkelgen joq. Degenmen, Qazaqstan men Reseı arasyndaǵy memlekettik shekaranyń uzyndyǵyn eskere otyryp, órt qaýpin joqqa shyǵarýǵa bolmaıdy. Sondyqtan jedel áreket etý jáne shektes aýmaqtardan órttiń ótip ketýine jol bermeý úshin kúshter men quraldardyń únemi ázirligin qamtamasyz etý kerek. Sondaı-aq Reseı Federatsııasynyń tıisti qyzmetterimen ýaqtyly habardar etý boıynsha ózara is-qımyldy kúsheıtý qajet», - dedi Premer-Mınıstr.
Úkimet basshysynyń dereginshe, orman órtterin sóndirý jumystaryna erikti órtke qarsy qurylymdar belsendi túrde tartylýda. Qazir eldi mekenderde 252 qurylym bar. Ótken jyly olarǵa zańdy tulǵa mártebesi berildi. Jyl basynan beri eriktiler 245 dala órtin óz kúshterimen sóndirgen.
«Ákimdikter órt sóndirý beketteri men erikti órtke qarsy qurylymdardy uıymdastyrý jumysyn jalǵastyrýy qajet. Olardy tıisti órt sóndirý quraldarymen jaraqtandyrýdy qamtamasyz etý kerek», - dedi Oljas Bektenov.
