Reseımen shekaradaǵy Qıǵash ózeninen balyq aýlaýǵa qazaqstandyqtarǵa ruqsat berilmeı otyr

Búgin QR Parlamenti Senatynyń jalpy otyrysynda Aýyl sharýashylyǵy mınıstriniń atyna saýal joldaǵan senator Sársenbaı Eńsegenov osylaı málim etti.

«Atyraý oblysynyń Qurmanǵazy aýdanyndaǵy 12 eldi mekenniń 1 myń 430 adamy qol qoıǵan haty kelip tústi. Bul hatta azamattar Qıǵash ózeninen kóktemgi balyq aýlaýdyń keshiktirilýine nemese múldem shyǵa almaı qalý qaýpine alańdaýshylyq bildiredi. 2009 jyly 12 tamyzda Aýyl sharýashylyǵy mınıstriniń balyq resýrstary jáne basqa da sý janýarlaryn paıdalanýǵa arnalǵan shekteýler men tyıymdardy engizý týraly buıryǵy shyqqan bolatyn. Osy buıryqqa sáıkes, Qıǵash ózeni men onyń qosalqy sý toǵandarynda balyq aýlaýǵa tyıym salý merzimderi naqty kórsetilgen. Budan bólek, Úkimettiń 2011 jylǵa arnalǵan balyq aýlaýdyń lımıtterin bekitý týraly qaýly da qabyldandy. Osy qaýlyǵa sáıkes, Qıǵash ózeninde aýlaýǵa bolatyn balyqtyń 18 túriniń lımıti bekitilgen. Ruqsat etilgen balyq túrleriniń ishinde bekire tuqymdas balyq tuqymdary joq. Sebebi, bundaı balyqtar Qıǵash ózenine kirmeıdi. Alaıda, sharýashylyq júrgizetin sýbektilerge osy kezge deıin ruqsat qaǵazdary berilmeı otyr», - deıdi senator.


Onyń aıtýynsha, atalmysh ózennen balyq qoryn, onyń ishinde bekire tuqymdas balyq qoryn qorǵaý týraly áńgimeler negizsiz. «Birinshiden, Qıǵash ózenine bekire tuqymdas balyqtar shyqpaıdy. Ekinshiden, Qıǵash ózeni Reseımen ekiarany bólip jatqan ózen. Sondyqtan, Reseıdiń Astrahan oblysynyń balyq aýlaıtyn sharýashylyqtary 2011 jylǵy 1 naýryzdan bastap balyq aýlaýǵa ruqsat alyp, jumysqa kirisip ketken. Al Qazaqstan balyqshylary bundaı múmkindikten shektelip otyr. Eger elimizdiń balyqshylary kórshiles eldiń balyqshylarymen bir mezgilde tartymǵa túspese, tabyssyz qalatyny sózsiz. Tipti, bir apta keshigýdiń ózi sharýashylyqtarǵa ǵana emes, memleketke de ekonomıkalyq zııanyn tıgizetini aıqyn, ári óńirdegi 10 myńdaǵan adam tabys pen tirshilik kózinen aıyrylýy múmkin», - deıdi S. Eńsegenov.