Reseımen shekaradaǵy aınalyp ótetin temirjol qurylysyn salý elimizge qymbatqa túsedi - Á. Isekeshev
ASTANA. QazAqparat - Reseımen shekaradaǵy aınalyp ótetin temirjol qurylysyn salý elimizge qymbatqa túsedi. Bul týraly búgin Parlament Májilisiniń jalpy otyrysynda Investıtsııalar jáne damý mınıstri Áset Isekeshev málim etti.
Jalpy otyrysta Qazaqstan men Reseı arasyndaǵy temir jol ýchaskeleri boıynsha tasymaldaý tólemderin rásimdeý tártibine ózgerister engizý máselesi qaralǵan edi.
Zań jobasyn talqylaý barysynda depýtattar Soltústik Qazaqstan oblysyndaǵy Reseımen shekaralas óńirlerde temirjolmen júk tasymalyna qatysty qıynshylyqtardy alǵa tartyp, ol boıynsha qabyldanatyn sharalar týraly suraǵan bolatyn. Máselen, qazaqstandyq azamattar Reseıge enetin temirjol ýchaskelerinde halyqaralyq tarıf boıynsha júk tólemin jasap keledi. Osyǵan baılanysty depýtattar eki el arasyndaǵy temirjol ýchaskeleri boıynsha tranzıttik almasýlar týraly másele kóterdi.
«Bul problema temirjol júıeleriniń tehnologııalyq shemalaryna qatysty oryn alyp otyr. Ondaǵy birinshi ýchaske tranzıttik joldardy qamtymaıdy. Sol boıynsha biz almasýlar jasap 300 shaqyrym temir joldy ózimizge aldyq, Reseı bizdegi 50 shaqyrym temirjoldy ıelendi. Endi qalǵany Reseıde Petropavl stansasy bolsa, biz Reseıdegi Lokot stansalaryn basqaryp kelemiz. Óıtkeni, bul biz úshin asa mańyzdy, tutastaı Batys Qazaqstan men Shyǵys Qazaqstandy baılanystyryp otyrmyz. Al Petropavl temirjol ýchaskesi Reseı úshin mańyzdy, óıtkeni ol Transsibir jolynyń tarmaǵynda tur», - dedi Investıtsııalar jáne damý mınıstri Áset Isekeshev.
Mınıstr bul rette Reseımen aradaǵy temirjoldar almasý tehnıkalyq jaǵynan múmkin ekenin, alaıda ekonomıkalyq turǵydan tarıfter belgileý boıynsha máseleniń sheshilýi qajettigin atap ótti. «Reseı Petropavl ýchaskesine qandaı tarıf belgilese biz de Lokot ýchaskesine sondaı tarıf qoıamyz. Qazirgi kúni Oraldy aınalyp ótý pýnktterin salý óte qymbat ári 600 shaqyrym bolyp tabylady. Eger biz Reseıden Petropavldy qaıtaratyn bolsaq, olardyń basqa da joldary bar, ońaı kete beredi. Sondyqtan da, biz Batys jáne Shyǵys Qazaqstan boıynsha qıyndyqtar týdyryp alýymyz múmkin. Osyǵan baılanysty tehnologııalyq jaǵynan eshqandaı problemalar bolyp otyrǵan joq», - dedi mınıstr.
