Reseımen shekaradaǵy pavlodarlyq ótkizý beketterin jańartý jumystary bastaldy

PAVLODAR. KAZINFORM — Shekaralyq ótkizý beketterin jańartýdyń respýblıkalyq jol kartasyna Pavlodar oblysynan 5 avtokólik ótkizý beketi engizilgen.

Memleket basshysy bıylǵy Joldaýynda elimizdegi shekaralyq beketterdiń jańǵyrtýdan ótkizý mindetin qoıǵany málim. Ertis-Baıan óńirindegi shekaralyq beketterdiń barlyǵy Reseı Federatsııasymen arada ornalasqan. 

— 2025-2027 jyldar aralyǵynda Pavlodar oblysynda Reseımen shekaradaǵy birneshe avtokólik ótkizý beketin jańǵyrtý josparlanyp otyr. Bul jobanyń maqsaty — shekaradaǵy ınfraqurylymdy jaqsartý, ótkizý qabiletin arttyrý jáne zańsyz tasymaldyń aldyn alý. Respýblıkalyq jol kartasyna «Qosaq», «Úrlitóbe», «Sharbaqty», «Amangeldi», «Naıza» avtomobıl ótkizý beketteri endi. Bıyl jalpy somasy 16 mlrd teńgege «Qosaq» avtokólik ótkizý beketin jańǵyrtý jumystary bastaldy. Keler jyly 19 mlrd teńgege «Úrlitóbe» beketin jańartý josparlanyp qoıdy. Ózgeleri aldaǵy jyldary birtindep jańartylady, — deıdi Pavlodar oblysy ákiminiń birinshi orynbasary Serik Batyrǵujınov.

Memlekettik shekarada ornalasqan atalǵan ótkizý beketterinde qazirgi kúni halyqaralyq tasymal men jolaýshylar aǵyny qozǵalysyna turaqty monıtorıng júrgizilip otyr.

Buǵan deıin Qyrǵyzstan men Ózbekstan shekarasynda elektrondy kezek júıesi engizilgeni týraly jazǵanbyz.