Reseımen shekaradaǵy Qurmanǵazy beketinde kezek máselesi qalaı sheshiledi
ATYRAÝ. KAZINFORM – Atyraý oblysynyń Reseımen shektesetin Qurmanǵazy aýdanyndaǵy ótkizý pýnktinde kólikterge arnalǵan avtoturaq nemese kútý aımaǵy joq. Bul respýblıkalyq mańyzy bar Atyraý-Astrahan tasjolynyń Bókeıhan aýylynyń tusyndaǵy bóliginde uzyn-sonar kezekke sebep bolyp otyr.
2024 jyly óńirdegi kúre joldy jańǵyrtý jumysy aıaqtala salysymen kólik aǵyny kúrt artty. Birneshe ret júzdegen júk kóligine jol boıynda kezegin saǵattap kútýge týra keldi.
Mundaı jaǵdaı kúni keshe 21 aqpan kúni de tirkeldi. Kezekte turǵandardyń basym bóligi shet memlekette tirkelgen. Ásirese ózbek aǵaıyndar kóp.
Atyraý oblysy memlekettik kirister departamenti elektrondy kezek boıynsha eshqandaı másele joq ekenin, júk kólikteri óz kezegine sáıkes ótip jatqanyn málimdedi.
Departamenttiń 12 qyzmetkeri jumys isteýde. Mamandardyń aıtýynsha, bul beketten kúnine bir baǵytta orta eseppen 230 júk kóligi ótedi.
Bıyl Atyraý oblysynyń Reseı memleketimen shekarasyndaǵy «Qurmanǵazy» avtomobıl ótkizý pýnkti qaıta jańǵyrtylmaq. Qazir jobasy jasaqtalý ústinde. Joba men jańǵyrtý jumysy qatar istele beredi.
Ótkizý pýnkti respýblıkalyq mańyzy bar «Aqtóbe — Qandyaǵash — Dossor — Atyraý — RF» avtomobıl jolynyń 892-893 shaqyrymynda ornalasqan.
Qazirgi ýaqytta servıstik aımaqta, ıaǵnı júk kólikterine arnalǵan turaq salý úshin jerdiń ósimdik qabatyn qyryp alynyp jatyr.
Ótkizý ǵımaratyn jańǵyrtý men júk kólikterine arnalǵan turaq salý jumysy bıyl bastalady. Bul jumysqa tapsyrys berýshi, ıaǵnı jaýapty — QazAvtoJoldyń Atyraý oblystyq fılıaly.
— Joba Kólik mınıstrligi avtomobıl joldary komıtetiniń buıryǵyna sáıkes «EAEO ishki shekarasyndaǵy avtomobıldik ótkizý pýnktterin jańǵyrtý» sheńberinde júzege asyp jatyr. Merdiger mekeme — «VD Stroı-ınjınırıng» JShS bul jobany 2027 jyldyń sońynda aıaqtaıdy, — dedi QazAvtoJol ulttyq kompanııasy Atyraý fılıalynyń dırektory Ardaq Qaıredenov.
Atalǵan ýchaskeniń júris bóliginiń eni — 28 metr, qosymsha jolaqtardy esepke alǵanda segiz qozǵalys jolaǵy qarastyrylǵan. Ótkizý pýnkti ýchaskesiniń uzyndyǵy — 0,735 km. Servıstik aımaq aýmaǵy — 8 gektar.
Osyǵan deıin óńirge jumys saparymen kelgen Májilis depýtattary shekara qaýipsizdigi máselesin kótergen edi.
