Reseımen shekaradaǵy «Qurmanǵazy» beketinde 280-ge jýyq júk kóligi kezekte turǵan

ATYRAÝ. KAZINFORM — Atyraý oblysynyń Reseı Federatsııasymen shekarasyndaǵy «Qurmanǵazy» beketinde kezekte 280-ge jýyq júk kóligi jınalyp qalǵan.

Memlekettik kirister komıtetiniń aqparatyna qaraǵanda, keptelistiń basty sebebi — shekaradan ótetin kólikterdiń kóbeıýi. Atyraýdan Reseı Federatsııasynyń shekarasyna deıingi jol qurylysynyń aıaqtalýy kólik sanynyń kúrt ósýine áser etken. 

«Alaıda, atalǵan pýnktegi ótkizý qabileti táýligine 200 avtokólikti quraıdy. Al, ótkizý pýnktine kún saıyn shamamen 250-den 300-ge jýyq kólik keledi. Máseleni jedel túrde sheshý úshin Atyraý oblysy boıynsha memlekettik kirister departamenti «Qurmanǵazy» pýnktinde jumys isteıtin mamandar sanyn 14 qyzmetkerge deıin ulǵaıtty. Ótken jyldan beri EAEO elderimen 30 ótkizý pýnktinde kólik ótkizý josparly túrde iske qosylǵan «CarGoRuqsat» elektrondyq kezek júıesi arqyly júzege asyrylady. Mundaı elektrondy kezek «Qurmanǵazy» pýnktinde 9 qyrkúıekten beri qoldanylady. Qazir elektrondy kezekke baılanysty problema joq. Barlyq júrgizýshide ótý talony bar. Ótkizý pýnktin kesip ótkenge deıin bir kún ishinde elektrondyq kezek merziminiń ótýine qatysty aqparattyq júıede ótkizý pýnktiniń ótkizý qabilettiligi asyp ketken jaǵdaıda, kezekti brondaý múmkindigi shekteledi, sondaı-aq pasporttyq, baqylaýdyń ózge de túrlerin, shektes taraptyń ótkizý múmkindigi eskerile otyryp, pysyqtaýlar júrgizilgeni habarlanady», — dep málim etti atalǵan komıtetten.

Memlekettik kirister komıteti Shekara qyzmetimen birlesip, kólikterdiń uzaq turýyn azaıtýǵa, ótkizý pýnktindegi jaǵdaıdy tezirek sheshýge jumystanyp jatyr. Memlekettik shekaralar arqyly, onyń ishinde Memlekettik kirister komıtetiniń aqparattyq júıeleriniń kómegimen júrý marshrýttaryn aldyn ala josparlaý qajet. 

Eske sala ketelik, budan buryn Reseımen shekaradaǵy «Qurmanǵazy» beketinde júk kólikteri kezekte turǵanyn jazǵan bolatynbyz.