Reseımen shekaradaǵy 10 aýylǵa baratyn jolda áli kúnge asfalt joq
ATYRAÝ. KAZINFORM — Atyraý oblysynyń Reseı Federatsııasymen shekarasyndaǵy Qurmanǵazy aýdanynda 10 eldi mekenge baratyn jolǵa asfalt tóselmegen. Biraq jyl saıyn sazdy topyraq tóselgen qara joldy kútip-ustaýǵa qarjy bólinedi.
Saz tóselgen jol
Qurmanǵazy aýdanynda № 7 razezden bastalyp, Súıindik aýylyna deıin sozylatyn jol bar. Jol boıynda 4 aýyldyq okrýgtiń 10 eldi mekeni ornalasqan.
Bul jolmen Qoshalaq, Asan, Úshtaǵan Azǵyr, Balqudyq, Jalǵyzapan, Qońyrterek, Eginqudyq, Batyrbek jáne Súıindik aýyldarynyń turǵyndary qatynaıdy.
Balqudyq aýylynda 1395, Azǵyrda 380, Qońyrterekte 265 turǵyn mekendeıdi. Al Asan aýylynda 569, Úshtaǵanda 653 adam tirkelgen.
Súıindik aýyl okrýgindegi Súıindik, Jalǵyzapan, Batyrbek, Eginqudyq aýyldarynda turatyn halyqtyń sany — 2 504.
Azǵyr aýyldyq okrýginiń ortalyǵy — Balqudyq aýylynyń baıyrǵy turǵyny, Qurmanǵazy aýdandyq máslıhatynyń depýtaty Mansur Qýanshalınniń aıtýyna qaraǵanda, keńes dáýiri kezinde de shalǵaıdaǵy 10 eldi mekenniń turǵyndary aýdan ortalyǵyna qara jolmen qatynaǵan.
Biraq 40 kún shildeniń ystyǵynda bul jolmen múmkin emes.
— Bul jol qum arasymen ótedi. Kún ábden ysyǵan kezde qum suıylyp, kóliktiń júrýine qıyndyq keltiredi. Kólikter qumǵa batyp qalady. Sondyqtan, aýdan basshylary 1980 jyldary qara jolǵa sazdy topyraq tógip, ábden nyǵyzdady. Óıtkeni, sol kezde Balqudyq asyl tuqymdy qoı zaýytynda 50 myńǵa jýyq qoı, 6 myńdaı jylqy, Súıindik asyl tuqymdy qoı zaýytynda 50 myńnan astam qoı, 7 myńnyń shamasynda jylqy boldy. Shopandar men jylqyshylarǵa saz tóselgen jolmen jem, pishen tasyldy. Qazir mundaı iri sharýashylyqtar joq, — deıdi Mansur Qýanshalın.
Onyń pikirinshe, jol — turǵyndardyń janyna batatyn túıtkil. Biraq jol salý máselesi sheshimin tappaı otyr.
— Jol salý máselesi qozǵalǵaly 40 jyldan asqan bolar. Elimiz táýelsizdigin alǵannan keıin de bul másele talaı aıtyldy. Biraq áli kúnge deıin naqty sheshim alynǵan joq. Oblysty basqarǵan birneshe ákim osy jolmen júrip ótti. Májilis pen Snattyń depýtattary da, túrli mınıstrliktiń basshylary da bul jolmen júrdi. Bul — memlekettik deńgeıde kóteriletin másele, — deıdi Mansur Qýanshalın.
Aýdan ákimi Abat Janǵalıevtiń usynǵan aqparatyna qaraǵanda, oblystyq mańyzy bar № 7 razezd-Asan-Balqudyq-Súıindik avtomobıl jolyn kútip-ustaýǵa 491 mln teńge bólingen.
— Joldy kútip-ustaýǵa 12 aqpanda «Ganıýshkın qurylys» JShS-men kelisimshart jasaldy. Onyń ishinde 2025 jylǵa 169 mln teńge qaraldy. Kelisimshart merzimi — 3 jyl. Atalǵan joldyń topyraǵyn tegisteý jáne qyrý jumystary atqarylady. Tapsyrys berýshi — oblystyq jolaýshylar kóligi jáne avtomobıl joldary basqarmasy, — degen aqparat berdi Abat Janǵalıev.
Asfaltsyz joldyń uzyndyǵy — 286 shaqyrym
«Qurmanǵazy joldary» JShS dırektory Aslan Baımenovtiń aıtýynsha, atalǵan joldy kútip-ustaý ońaı sharýa emes.
— Joldy kútip-ustaý jumysynyń qıyndyǵyn jete bilemin. Óıtkeni bizdiń kompanııa 2011 jyldan beri osy jumysty atqaryp keldi. Joldyń qashyqtyǵy — 286 shaqyrym. Jolǵa asfaltty aıtpaǵannyń ózinde, qıyrshyq tas ta tóselmegen. Kezinde sharýashylyqtarǵa jemshóp tasymaldaý úshin saz topyraq ǵana tóselgen ǵoı. Sodan beri eshteńe tóselgen joq. Biz jyl saıyn sol sazdy tegistep, kóliktiń júrýine toqtaýsyz jaǵdaı jasadyq. Alaıda qyrý, tegisteý sekildi jumystyń jasalǵany kórinbeıdi. Óıtkeni bir-eki aýyr júk kóligi júrip ótse, jol qaıtadan búlinedi, — deıdi Aslan Baımenov.
Onyń aıtýyna qaraǵanda, joldy tegisteý, qyrý jumystarynyń nátıjesi baıqalatyn eki kezeń bar.
Birinshisi kezeń — naýryz, sáýir, mamyr aılary. Sonan soń qazannan jeltoqsanǵa deıin kezeńde jumystyń nátıjesi kórinedi.
— Júrgizýshiler jazǵy ystyqta joldy tegistemeýdi suraıdy. Sebebi maýsymnan tamyzǵa deıin qum suıylyp, kóliktiń júrýi qıyndaıdy. Osy kezde joldy tegistelse, burynǵy qalpynan aıyrylyp qalady, — deıdi Aslan Baımenov.
Bıyl atalǵan jolda kútip-ustaý jumysyn atqaratyn merdiger ózgergen. Endi bul mindet «Ganıýshkın-Qurylys» JShS-ǵa júktelgen.
Kompanııa dırektory Erbol Qurmanovtyń málimetine súıensek, jumysqa 16 adam tartylǵan.
— Bizde joldy tegisteıtin 3 avtogreıder, qajetti ınertti materıaldardy tasymaldaıtyn 3 MAZ, 3 júk tıeıtin tehnıka bar. Jumysshylardy 1 ÝAZ, 2 GAZel kóligimen tasymaldaımyz. Jazda shań kóterilmes úshin 1 tehnıka sý shashady. Al qysqy maýsymda 3 tehnıkamen tuz sebemiz, — deıdi Erbol Qurmanov.
Eske sala ketelik, budan buryn «Muqyr-Qulsary» jolyn jóndeýge tsıfrlyq teńge paıdalanylatynyn jazǵan edik.