Reseımen shekarada 200-deı júk kóligi turyp qaldy
ORAL. KAZINFORM – Batys Qazaqstan oblysynda Reseı Federatsııasy baǵytynda 6 shildeden bastap «Syrym» avtomobıl ótkizý beketinde 200-ge jýyq júk kóligi turyp qaldy.
Memlekettik kirister komıtetinen málim etkenindeı, Reseı tarapynan shekaralyq baqylaý protsesteriniń baıaýlaýy keptelistiń negizgi sebebi bolyp otyr.
«Qolda bar aqparatqa sáıkes Reseıdiń shekara qyzmeti „Mashtakov“ ótkizý beketinde ınspektsııalyq-tekserý kesheniniń jumysyndaǵy problemalarǵa baılanysty júkterge fızıkalyq baqylaý júrgizedi. Qazaqstandyq tarap jaǵdaıdy retteý úshin reseıliktermen jumys júrgizýde», — dep habarlady vedomstvodan.
Aıta keteıik, EAEO elderimen shekarada memlekettik kirister organdary tek tasymaldanatyn júkterge monıtorıng júrgizedi (5-7 mınýt ishinde), bul keptelis týǵyzbaıdy.
«Syrym» avtomobıl ótkizý beketi shtattyq rejımde jumys istep jatyr.
