Reseımen munaı jetkizý salasynda, Serbııamen áskerı salada yntymaqtastyq: Quryltaı zań jobalaryn qaraıdy
ASTANA. KAZINFORM – Búgin Quryltaı otyrysy ótedi. Onda depýtattar , otandyq óner qaıratkerlerine jańa memlekettik marapattar belgileý, Reseımen munaı jáne munaı ónimderin jetkizý salasyndaǵy saýda-ekonomıkalyq yntymaqtastyqty jáne Serbııamen áskerı-tehnıkalyq yntymaqtastyqty damytý máselelerin talqylamaq.
Aıta keteıik, 2 qazanda Quryltaı Spıkeri Aıbek Dádebaıdyń tóraǵalyǵymen ótken Bıýroda Quryltaıdyń búgingi otyrysynyń kún tártibi belgilendi. Soǵan oraı «Qazaqstan Respýblıkasynyń memlekettik nagradalary týraly» zańǵa ózgerister men tolyqtyrýlar engizý týraly zań jobasy, sondaı-aq Reseımen munaı jáne munaı ónimderin jetkizý salasyndaǵy saýda-ekonomıkalyq yntymaqtastyq, Serbııamen áskerı-tehnıkalyq yntymaqtastyq týraly ratıfıkatsııalyq qujattar qaraýǵa shyǵarylyp otyr.
«Qazaqstan Respýblıkasynyń memlekettik nagradalary týraly» Zańǵa ózgerister men tolyqtyrýlar engizý týraly zań jobasy Memleket basshysynyń tapsyrmasyn oryndaý aıasynda Quryltaı depýtattarynyń bastamasymen ázirlendi. Zań jobasy otandyq qaıratkerlerdiń eńbegin laıyqty baǵalaýǵa baǵyttalǵan. Qujatta jańa erekshelik belgilerin engizý kózdelgen. Atap aıtqanda, otandyq mýzyka óneri men án shyǵarmashylyǵyn damytýǵa sińirgen aıryqsha eńbegi úshin «Shámshi Qaldaıaqov» medali, sondaı-aq beıneleý óneri salasyndaǵy kórnekti týyndylary úshin «Qazaqstannyń eńbek sińirgen sýretshisi» qurmetti ataǵyn engizý usynylady.
Munan bólek, birinshi oqylymda Qazaqstan Respýblıkasyna munaı jáne munaı ónimderin jetkizý salasyndaǵy saýda-ekonomıkalyq yntymaqtastyq týraly Qazaqstan men Reseı Úkimetteri arasyndaǵy 2010 jylǵy 9 jeltoqsanda rásimdelgen kelisimniń qoldanysyn qaıta bastaý jáne oǵan ózgerister engizý týraly hattamany ratıfıkatsııalaý jónindegi zań jobasy qaralady.
Ekinshi oqylymda depýtattar Qazaqstan men Serbııa Úkimetteri arasyndaǵy áskerı-tehnıkalyq yntymaqtastyq týraly kelisimdi ratıfıkatsııalaý jónindegi zań jobasyn qaraıdy. Qujattyń maqsaty – teń quqylyq qaǵıdaty negizinde eki el arasyndaǵy ózara tıimdi áskerı-tehnıkalyq yntymaqtastyqty jolǵa qoıý jáne odan ári damytý.
Quryltaı kún tártibine Qazaqstan Respýblıkasy Quryltaıynyń I shaqyrylymy janynan máslıhattarmen ózara is-qımyl jónindegi keńes qurý máselesi engizilgen.
Quryltaıdyń alǵashqy sessııasynyń ashylýynda Memleket basshysy azamattardyń taǵdyry men ómirine qatysty zańdardy jan-jaqty qarap, keńinen talqylaýdyń mańyzyn atap ótken bolatyn. Osy baǵytta Quryltaı janynan máslıhattarmen ózara is-qımyl jónindegi keńes qurýǵa mańyzdy ról júkteledi.
Keńestiń negizgi mindeti – máslıhattardyń zańdardy ázirleý protsesine turaqty qatysýyn qamtamasyz etý jáne olardyń jergilikti jerlerde qoldanylýyna qatysty keri baılanys ornatý. Basym baǵyttardyń qatarynda zańdardy qoldaný praktıkasyna monıtorıng júrgizý, óńirlerge ortaq problemalardy anyqtaý jáne zańnamany jetildirý jóninde usynystar ázirleý bar.
Esterińizge sala ketsek, ótken aptada Quryltaı «Qazaqstan Úkimeti men Qatar Úkimeti arasyndaǵy qylmysqa qarsy kúrestegi yntymaqtastyq týraly kelisimdi ratıfıkatsııalaý týraly», «2010 jylǵy 10 jeltoqsandaǵy Táýelsiz Memleketter Dostastyǵyna qatysýshy memleketterdiń adamdardy memleketaralyq izdestirý týraly shartyna ózgerister engizý týraly hattamany ratıfıkatsııalaý týraly», “Kompıýterlik qylmystar týraly konventsııany ratıfıkatsııalaý týraly», «1994 jylǵy 15 sáýirdegi Dúnıejúzilik saýda uıymyn qurý týraly Marrakesh kelisimine Qazaqstan Respýblıkasynyń qosylýy týraly hattamaǵa qosymsha bolyp tabylatyn Kórsetiletin qyzmetter boıynsha Qazaqstan Respýblıkasynyń erekshe mindettemeleriniń tizbesine ózgeristerdi ratıfıkatsııalaý týraly» Zańdardy qabyldady.
Otyrys sońynda Quryltaı depýtattary ózekti áleýmettik jáne ekonomıkalyq máseleler boıynsha memlekettik organdarǵa 15 depýtattyq saýal joldady. Máselen, depýtat Dana Medeýova medıtsına qyzmetkerleriniń kásibı mártebesine qatysty usynys aıtty.
- Bizdiń mindetimiz – dárigerlerdiń tómen jalaqyǵa baılanysty mamandyǵyn tastap ketpeýine jaǵdaı jasaý. Bilimi men tájirıbesi el ıgiligine qyzmet etýi úshin olardyń eńbegin laıyqty baǵalaýymyz kerek, - dedi Dana Medeýova.
Depýtat Bórihan Nurmuhamedov turǵyn úı qoljetimdiliginiń óńirlik kórsetkishteriniń resmı júıesin engizý qajettigin alǵa tartty. Al depýtat Rýslan Ydyrysov shaǵyn azyq-túlik saýdasyna memlekettik qoldaý kórsetý tásilderin qaıta qaraýdy usyndy.
— 2020 jyly Qazaqstan Ulttyq banki áleýmettik mańyzy bar salalarda — dárihana, bilim berý jáne medıtsınada — bankaralyq komıssııalardy (ıntercheındj) 1,5 paıyzǵa deıin shekteý tetigin sátti qoldandy. Bul tásildi «úı janyndaǵy» dúkender formatyndaǵy azyq-túlik bólshek saýdasyna da qoldaný qajet. Dúkenniń taza marjasy 8–12 paıyz bolǵan jaǵdaıda, bank ekvaırıngine tólenetin 1,5–2,5 paıyzdyq komıssııa dúkenniń taza paıdasynyń tórtten birine deıin jetýi múmkin, — dedi ol.
Sondaı-aq Depýtat Aıjan Sqakova «Taza Qazaqstan» aıasynda qorshaǵan ortany qorǵaý, Mahambet Hasenov joǵary bilim berýdiń úsh jyldyq modelin keńeıtý jáne kadr daıarlaýdy ekonomıka qajettilikterine saı beıimdeý máselesin kóterdi.
