Reseımen kelissóz barysynda ýkraın delegatsııasyn Rýstem Ýmerov basqarady
ASTANA.KAZINFORM — Ýkraına prezıdenti Vladımır Zelenskıı Reseı Federatsııasymen kelissóz júrgizý úshin delegatsııa qurýdy tapsyrdy, ony Rýstem Ýmerov basqarady, dep habarlaıdy TASS.
— Men reseılik tarappen kelissóz júrgizý úshin delegatsııa qurýdy tapsyrdym. Delegatsııany Rústem Ýmerov basqarady, — dep jazdy Zelenskıı Telegram-arnasynda.
Buǵan deıingi delegatsııany da sol kezde eldiń Qorǵanys mınıstri qyzmetin atqarǵan Ýmerov basqardy. Alaıda ol 16 shildede úkimettiń tolyq quramyn taratqanda qyzmetinen aıyryldy. 18 shildede Zelenskıı Ýmerovty Ulttyq qaýipsizdik jáne qorǵanys keńesiniń hatshysy etip taǵaıyndady. Zelenskııdiń aıtýynsha, delegatsııa quramynda onyń keńsesiniń, Ýkraına barlaý qyzmetiniń jáne Ýkraına Syrtqy ister mınıstrliginiń ókilderi de bolady. Kelissózderdiń jańa raýndy aldynda Zelenskıı Ýmerovpen jáne onyń keńsesiniń basshysy Andreı Ermakpen kezdesti. Ýmerov «Reseı tarapymen Ystanbulda ótken ekinshi kezdesýdegi kelisimderdiń oryndalý barysy jáne jaqyn arada jańa kezdesý týraly kelisimder týraly» baıandady.
Buǵan deıin Vladımır Zelenskıı Reseı men Ýkraına arasyndaǵy kelesi kelissóz sársenbige, 23 shildege josparlanǵanyn jáne Túrkııada ótetinin aıtqan.