Reseımen gaz kelisimi Taıaý Shyǵystyń múddesin kózdeıdi - Mohammad Mohber

ASTANA.KAZINFORM - Reseı men Iran jan-jaqty yntymaqtastyq týraly memleketaralyq kelisimge qol qoıý aldynda tur, onyń bir bóligi 26 maýsymda Tegeranda Iranǵa reseılik gazdy jetkizýdi uıymdastyrýdy ázirleý týraly memorandýmǵa qol qoıý boldy.

Sársenbi kúni «Gazprom» basqarma tóraǵasy Alekseı Mıller bastaǵan delegatsııanyń Iranǵa sapary aıasynda Iranǵa reseılik gaz jetkizýdi uıymdastyrýdy damytý boıynsha strategııalyq memorandýmǵa qol qoıyldy. Ol respýblıkanyń Munaı mınıstri Djavad Oýdjımen kezdesý ótkizdi.

Iran prezıdentiniń mindetin atqarýshy Mohammad Mohber sársenbi kúni Reseı prezıdenti Vladımır Pýtınmen telefon arqyly sóılesýinde memorandýmǵa qol qoıýdy eki el arasyndaǵy qarym-qatynastardy tereńdetý jolyndaǵy mańyzdy qadam jáne aımaqtyń ekonomıkalyq damýy úshin tıimdi shara dep atady.

- Bul jospardy júzege asyrý eki eldiń ekonomıkalyq múddesin ǵana emes, búkil aımaqtyń múddesin qamtamasyz etedi, - dedi Iran prezıdentiniń mindetin atqarýshy.

Mohber eki el arasyndaǵy kelisimderdiń oryndalý barysyna qanaǵattanǵanyn aıtty, sonymen qatar eki eldiń aımaqty turaqtandyrýǵa baǵyttalǵan kúsh-jigeri qajetti nátıje beretinine senim bildirdi. Ol sondaı-aq Tegeran men Máskeý kelissózderiniń mańyzdylyǵyn atap ótti.

Gazpromnyń bas dırektory, Reseı Federatsııasy prezıdentiniń arnaıy ókili Alekseı Mıllermen kezdesý barysynda Mohammad Mohber Reseı gazyn Iranǵa eksporttaý týraly ózara túsinistik týraly memorandýmǵa qol qoıý aımaqtyń qaýipsizdigi men ekonomıkasyn arttyrý úshin mańyzdy qadam ekenin aıtty.

Buǵan deıin Irannyń munaı mınıstri Djavad Odjı Reseı, Katar jáne Túrkimenstanmen birlesip el aýmaǵynda gaz habyn qurýdy josparlap otyrǵanyn aıtqan bolatyn.