Reseımen ekijaqty kooperatsııa nátıjesinde 30 myń jumys orny qurylǵan

ASTANA. QazAqparat – Ekijaqty kooperatsııalyq baılanystardyń arqasynda 30 myń jumys orny qurylǵan. Qazaqstan – Reseı óńiraralyq yntymaqtastyq forýmynyń XVIII jalpy otyrysynda Memleket basshysy Qasym-Jomart Toqaev osyndaı derek keltirdi, dep habarlaıdy QazAqparat tilshisi.

«Sonymen qatar bizdiń elderimizdiń saýda-ekonomıkalyq yntymaqtastyǵyn odan ári kúsheıtýge qajet aıtarlyqtaı áleýet bar. Bizdi erekshe qyzyqtyratyn baǵyttardyń biri – kooperatsııalyq yntymaqtastyq», - dedi Qasym-Jomart Toqaev

Prezıdent kooperatsııalyq baılanystardyń arqasynda 110 birlesken joba iske asqanyn atap ótti.

«Olardyń jalpy quny 23 mlrd dollardan asyp, 30 myńdaı jumys orny quryldy. Bul elderimizdiń ónerkásip kooperatsııasy úshin jaqsy kórsetkish», - dedi Memleket basshysy.

Aıta keteıik, Memleket basshysy Qasym-Jomart Toqaev Reseı óńiraralyq yntymaqtastyq forýmynyń XVIII jalpy otyrysyna beınekonferentsııa formatynda qatysty.