Reseımen áriptestik Qazaqstandaǵy bilim salasynyń damýyna eleýli úles qosady – Prezıdent

MÁSKEÝ. QazAqparat – Reseımen áriptestik Qazaqstandaǵy bilim salasynyń damýyna eleýli úles qosady. QR Prezıdenti Qasym-Jomart Toqaev reseılik áriptesi Vladımır Pýtınmen ótken kelissózderden keıingi birlesken málimdemesinde osylaı dedi, dep habarlaıdy QazAqparat tilshisi.

Onyń aıtýynsha, eki el arasyndaǵy ózara tıimdi saýdanyń úlesi 70 paıyzǵa jýyqtaǵan.

«Qazaqstan men Reseıdiń ónimdi seriktestigi jańa ınnovatsııalyq ósimder esebinen udaıy keńeıip jatyr. Búgin eki eldiń tsırflandyrýdyń, ǵaryshty ıgerý men atom energetıkasy salasynda mamandar daıarlaýdyń ózekti máseleleri boıynsha aıtarlyqtaı alǵa jyljýyna múmkindik beretin birqatar qujattarǵa qol qoıyldy», - dedi Qazaqstan basshysy.

Sondaı-aq, Memleket basshysy kórshi eldiń tehnıkalyq joǵary oqý oryndarynyń áleýetin bizdegi maman tapshylyǵyn sheshýge ońtaıly paıdalanýǵa bolatynyn atady.

«Qazaqstanda ınjenerlik-tehnıkalyq beıindegi joǵary bilikti mamandardyń suranysqa ıe ekenin eskere otyryp, bilim berý salasyndaǵy áriptestikke erekshe mán berildi.

Men búgingi kelissózder barysynda qurmetti Vladımır Vladımırovıchke Reseı Federatsııasynyń eń tanymal joǵary oqý oryndarynyń, birinshi kezekte, tehnıkalyq joǵary oqý oryndarynyń fılıaldaryn Qazaqstanǵa baǵyttaýǵa keliskeni úshin rızashylyq bildirdim. Men bul fılıaldar bizdiń eldegi bilim salasynyń damýyna eleýli úles qosady dep oılaımyn», - dedi Qasym-Jomart Toqaev.

Aıta keteıik, Reseı Federatsııasynyń astanasynda QR Prezıdenti Qasym-Jomart Toqaev pen RF Prezıdenti Vladımır Pýtın kelissóz júrgizdi.

Memleket basshysynyń Reseıge jumys sapary aıasynda birqatar qujatqa qol qoıyldy.