Reseılikter endi qumar oıyndardan ózderin shekteı alady
ASTANA. KAZINFORM — Reseılikter qumar oıyndarǵa ózine 1 qyrkúıekten bastap tyıym sala alady. Bul shekteý kazınolarǵa, oıyn avtomattary zaldaryna, býkmekerlik keńseler men totalızatorlarǵa qatysty bolady.
Ózine shekteý qoıýdyń eki joly bar: jeke kýálik nemese tólqujatpen kez kelgen HQKO-ǵa (MFTs) júginý nemese elektrondyq qoltańbany paıdalanyp «Memlekettik qyzmetter» («Gosýslýgı») portaly arqyly onlaın ótinish berý.
Azamat ózin shekteý merzimin ózi belgileıdi, alaıda ol 12 aıdan kem bolmaýy kerek. Belgilengen merzim aıaqtalǵanǵa deıin tyıymdy alyp tastaýǵa bolmaıdy.
Ótinish berilgennen keıin azamat týraly málimetter arnaıy tizimge 12 saǵattan keshiktirilmeı engiziledi. Tizimge engizilgeni týraly aqparat «Gosýslýgı» portalyndaǵy jeke kabınette kórsetiledi.
Bul tizim ınternette ashyq jarııalanbaıdy. Oǵan qumar oıyndardy uıymdastyrýshylar, bás aýdarymdaryn esepke alýdyń biryńǵaı ortalyǵy jáne baqylaýshy organdar ǵana qol jetkize alady.
Tizimge engizilgennen keıin azamatqa, onyń ishinde ınternet arqyly da, bás tigýge, kazınolar men oıyn avtomattary zaldarynan fıshkalar alýǵa, sondaı-aq qumar oıyndardy uıymdastyrýshylarmen utys týraly kelisimder jasasýǵa tyıym salynady. Sonymen qatar oǵan qumar oıyndardyń jarnamasyn jiberýge de jol berilmeıdi.
Azamat ózin tizimnen tek oǵan engizilgennen keıin 12 aı ótken soń ǵana shyǵara alady. Ol úshin MFTs nemese «Gosýslýgı» arqyly ótinish berý qajet. Eger ózine tyıym salý belgili bir merzimge belgilense, shekteý sol merzim aıaqtalǵannan keıin avtomatty túrde alynady.
Jańa júıe qumar oıyndardyń barlyq zańdy túrine engiziledi. Negizgi maqsat – lýdomanııanyń aldyn alý.
Eske salaıyq, buǵan deıin qumar oıyndarǵa táýeldilik qalaı emdeletinin jazǵanbyz.
