Reseılik «Torpedo» komandasy «Barys» qaqpasyna 10 shaıba soqty
ASTANA. KAZINFORM - Qazaqstandyq «Barys» komandasy Qurlyqtyq hokkeı lıgasyndaǵy kezekti oıynyn elordada Reseıdiń «Torpedo» (Nıjnıı Novgorod) komandasyna qarsy ótkizdi.
Elordalyq klýb bıylǵy maýsymda súreńsiz oıyn órnegin kórsetip, jankúıerleriniń úmitin aıaqtaı almaı júr. Qazirge deıin 10 kezdesýdiń 8-inde qarsylasyna ese jiberdi. Sol sátsizdik serııasy búgin de jalǵasty.
Bas bapker qyzmetine jaqynda taǵaıyndalǵan reseılik maman Vıacheslav Býtsaev ta jeńistiń kiltin taba alar emes. Onyń jetekshiligimen ótken úsh oıynnyń ekeýinde elordalyq komanda qarsylastaryna ese jiberdi.
Kezdesý barysynda «Torpedo» sapynan Dmıtrıı Kagarlıtskıı 9, Nıkıta Artamonov 12-mınýtta eki gol soǵyp ketti. Oǵan Anton Býrdasov 14-mınýtta bir golmen jaýap qaıyrdy.
Ekinshi kezeńde reseılik komanda tórt golmen basymdyqty arttyra tústi. Ony Mıhaıl Orlov 28, Mıhaıl Abramov 32, Bobbı Lınch 33, Nıkıta Shavın 34, Denıs Pochıvalov 39-mınýtta óziniń enshisine jazdy. Úshinshi kezeńde Sergeı Goncharýk 47, Vladıslav Fırstov 53, Evgenıı Svechnıkov 55-mınýtta mergendik tanytty. Osylaısha elordalyq klýb qarsylasyna 1:10 esebimen ese jiberip, bul maýsymda eń iri jeńilistiń aşy dámin tatty.
Qazaqstandyq komanda aldaǵy úsh oıynyn syrt alańda ótkizedi. Aldymen 3 qazanda Reseıde «Spartak» (Máskeý) komandasymen oınasa, odan keıin 5 qazanda «Avangard» (Omby), 7 qazanda «Avtomobılıst» (Ekaterınbýrg) komandasymen sheberlik baıqasady.
Eske salsaq, budan buryn «Vıtıaz» komandasynan óz aıdynynda jeńilip qaldy.
