Reseılik sportshynyń týystary Bosfor arqyly júzýdi uıymdastyrýshylardy sotqa bermek
ASTANA. KAZINFORM – Joǵalǵan júzýshi Svechnıkovtyń otbasy Bosforda júzýdi uıymdastyrýshylardy sotqa berip jatyr, dep habarlaıdy Kazinform menshikti tilshisi.
Bosfor buǵazy arqyly dástúrli halyqaralyq júzý kezinde joǵalyp ketken reseılik júzýshi Nıkolaı Svechnıkovtyń otbasy jarysty uıymdastyrýshylardy sotqa berýge daıyndalyp jatyr. Sportshynyń týystary sharany uıymdastyrýshylardy nemquraılylyq tanytyp, qaýipsizdik sharalaryn buzdy dep aıyptap otyr.
Nıkolaı Svechnıkov jyl saıyn álemniń túkpir-túkpirinen myńdaǵan qatysýshylardy tartatyn Bosfor arqyly qurlyqaralyq júzý kezinde joǵalyp ketti. Onyń otbasynyń aıtýynsha, jarys kezinde aýa raıy jaǵdaıy eleýli túrde baǵalanbaǵan, qatysýshylarǵa baqylaý jetkiliksiz bolǵan, al qutqarý qyzmetiniń áreketi jetkilikti túrde jedel bolǵan joq.
— Biz Nıkolaıǵa naqty ne bolǵanyn áli bilmeımiz. Uıymdastyrýshylardan birde-bir naqty jaýap joq. Adamdar jaı ǵana sýǵa batty, boldy. Qoldaý da, baqylaý da joq, — deıdi júzýshiniń aǵasy Ilıa Svechnıkov.
Otbasynyń sendirýinshe, qatysýshylardy, ásirese jergilikti tilde sóılemeıtin sheteldik sportshylardy yqtımal qaýipter týraly habardar etý jetkiliksiz bolǵan.
Otbasynyń advokattary Túrkııa sotynda talap-aryz ázirlep jatyr jáne halyqaralyq organdarǵa shaǵymdanatynyn joqqa shyǵarmaıdy. Basty talap — uıymdastyrýshylardyń jaýapkershiligin moıyndaý jáne mundaı buqaralyq sporttyq is-sharalarda qaýipsizdik standarttaryn qaıta qaraý.
Túrkııa bıligi men Sý sporty federatsııasynyń ókilderi bul iske qatysty ázirge resmı túsinikteme bergen joq. Svechnıkovty izdeý amaldary jalǵasyp jatyr, biraq kún ótken saıyn úmit sónip barady.
Bosfor arqyly qurlyqaralyq júzý 1989 jyldan beri ótkizilip keledi jáne ashyq sýda júzý boıynsha eń bedeldi buqaralyq jarystardyń biri sanalady. Bedeline qaramastan, sońǵy jyldary qatysýshylar uıymdastyrý deńgeıi jáne qaýipsizdikke qatysty alańdaýshylyǵyn bildirip júr.
Buǵan deıin osfor arqyly ótken qurlyqaralyq júzý kezinde reseılik sportshy Nıkolaı Svechnıkovtyń joǵalýynan keıin, Ystanbulda taǵy bir sheteldik azamat — Belarýs sporttyq yntymaqtastyq qorynyń halyqaralyq bólim basshysy Anatolıı Kotov jumbaq jaǵdaıda iz-túzsiz ketkenin jazǵan bolatynbyz.