Reseılik sarapshy: Qazaqstannyń jańa saıasaty jastarǵa súıenedi
ASTANA. KAZINFORM — Qazaqstan Prezıdentiniń Respýblıka kúnine arnalǵan saltanatty is-sharadaǵy sózi el ómirindegi jańa dáýirdiń bastalýymen baılanysty. Bul týraly Kazinform agenttiginiń menshikti tilshisine Reseıdiń Aımaqtyq máseleler ınstıtýtynyń dırektory Dmıtrıı Jýravlev málimdedi.
Sarapshynyń aıtýynsha, sózdiń alǵashqy bóligi qorytyndy jasaýǵa, qol jetkizilgen tabystar men nátıjelerge arnalǵan — bul ómir súrý deńgeıi men uzaqtyǵynyń artýy, atqarýshy bılik reformalary jáne ózge de qajetti sharalar.
— Jańa kezeń úshin basty nazar — jastarda. Dál osy jastar — mátinde negizgi kategorııa retinde kórsetilgen. Bul durys, óıtkeni erteńgi kúndi jastarǵa súıene otyryp qana qurýǵa bolady. Al Qazaqstan Prezıdenti olarǵa damý múmkindikterin usynyp otyr. Munda bilim berýdi damytý, jastar arasyndaǵy halyqaralyq baılanystar bar. Múmkin, eń bastysy bul tsıfrlandyrý, ol tabıǵı túrde jastarmen baılanysty, — dedi Jýravlev.
Onyń pikirinshe, tsıfrlandyrý jastarǵa jańa múmkindikter ashady. Sarapshy sondaı-aq Qazaqstandaǵy qos palataly Parlament reformasyna nazar aýdardy.
— Munyń ózindik mańyzdy máni bar, óıtkeni osylaısha partııalardyń pozıtsııasy nyǵaıady, olardyń mańyzy artady. Sebebi postkeńestik respýblıkalarda partııalar aıtarlyqtaı ról atqarǵan joq, bul obektıvti sebepterge baılanysty edi aldymen bılik paıda boldy, sodan keıin ǵana partııalar, — dedi Jýravlev.
Onyń pikirinshe, endi parlamentke tek partııalar arqyly ǵana ótýge bolady jáne saıasattyń joǵary deńgeıine de tek parlament arqyly jol ashylady. Saıasat salasynda jumys isteýdi kózdegen adam úshin basty is-áreket núktesi, tabysqa jetý quraly — partııadaǵy jumys bolmaq. Osylaısha, partııa saıası júıeniń jaı ǵana bir bóligi emes, onyń tirek qurylymyna, negizgi elementine aınalady.
— Bul óte mańyzdy ózgeris, syrt kózge qarapaıym ári asa úlken emes kóringenimen, is júzinde áldeqaıda mańyzdy, túbegeıli basqa saıası júıe qalyptasýda. Al bul jańa saıası júıe de edáýir dárejede jastarmen baılanysty bolady, — dedi ol.
Osylaısha, sarapshy Memleket basshysynyń sózin eki negizgi bólikke bólýge bolatynyn atap ótti: qol jetkizilgen tabystar jáne alda turǵan maqsattar.
Buǵan deıin Qasym-Jomart Toqaev qazaqstandyqtardy Respýblıka kúnimen quttyqtaǵany habarlanǵan bolatyn.