Reseılik sarapshy Qazaqstannyń 6 jyldaǵy eń mańyzdy jetistigin atady

ASTANA. KAZINFORM — Reseılik sarapshy Arkadıı Dýbnov Kazinform agenttigine bergen suhbatynda Ortalyq Azııa jáne álemdik arenada óńirde qatynastyń qalaı ózgergeni týraly aıtyp berdi. 

Saıasattanýshynyń paıymynsha, Ortalyq Azııadaǵy eń baıypty ózgerister 2021 jyly bolǵan asa rezonansty oqıǵa — Aýǵanstannan amerıkalyq áskerdiń shyǵarylýynan keıin boldy. Bul aımaq úshin syn-qaterge aınaldy. Óıtkeni Kabýlda bılikke kelgen Talıban qozǵalysynyń qandaı da bir túrde óktemdik júrgizýi múmkin degen alańdaýshylyqqa baılanysty eleýli qaýip bolǵan edi. Alaıda, bul qaýip shekten tys alańdaýshylyq bolyp shyqty. Tálipter ózgere alatyn, aýǵanishilik shynaıy jaǵdaıda beıimdeletin radıkaldar bolyp shyqty.

Qazaqstan tálipter rejımine ekonomıkalyq yntymaqtastyqqa beıimdeýge bolatyndyǵyn baıqap, olarmen jaqyn bolý perspektıvalaryna jetkilikti teńgerimdi kózqaras tanytqan Ortalyq Azııa elderiniń qatarynan tabyldy. AQSh-tyń Ortalyq Azııadan ketýiniń oń áserleri de boldy: aımaq AQSh-tyń áskerı qatysýynyń tyldyq bazasy bolýdan qaldy. Bul Ortalyq Azııa elderiniń Reseı jáne Qytaımen qarym-qatynasyn qıyndatatyn faktorlardyń biri edi.

Arkadıı Dýbnov erterekte ózekti bolǵan OA+ formaty aımaqta tarıhı turǵyda mekendegen dinı jáne etnıkalyq jaqyn halyqtardyń múddelerin bildiretin álemdik geosaıasattyń ajyramas sýbektisi retinde óńirdi qosymsha ınstıtýttandyrý qyzmetin atqaratynyn atap ótti.

— Osy turǵydan alǵanda, bul — mádenı dástúrleri tereńde jatqan, álemniń basqa aımaqtaryna yqpal etken tutas derlik órkenıetti kórsetetin biregeı aýmaq. Otyryqshy jáne kóshpeli halyqtar, eýropalyq jáne azııalyq mádenıetter arasyn baılanystyrýshy qandaı da bir kópir sanalatyn Qazaqstan osynaý tarıhı paradıgmada erekshe oryn alady, — dep túsindiredi sarapshy.

Onyń aıtýynsha, postındýstrıaldy dáýirde Qazaqstannyń bul róli álemdik damýdyń ártúrli ortalyqtary úshin erekshe suranysqa ıe bolyp otyr.

— Bul tek Qazaqstannyń mol tabıǵı resýrstaryna ǵana baılanysty emes, sonymen qatar onyń EO, AQSh, Japonııa, Reseı jáne Qytaı ekonomıkalaryn baılanystyratyn iri kólik-logıstıkalyq hab retindegi múmkindikterine de qatysty, — dedi Arkadıı Dýbnov.

Sarapshy mundaı mol resýrsty iske asyrýdyń ózi Qazaqstannyń «orta derjava» retindegi bar múmkindikterin «kapıtaldandyrýdyń» joǵary deńgeıine yqpal ete alady dep sanaıdy.

— Bul Prezıdent Toqaev aıryqsha bóle kórsetetin atalǵan mártebeniń ózektiligin qýattaı túsedi. Menińshe, Qazaqstannyń sońǵy 6 jyldaǵy eń basty jetistigi — Qasym-Jomart Toqaev otandastary arasynda ornyqtyrýǵa umtylatyn saıası táýelsizdik pen tarıhı egemendiktiń qadir-qasıeti erekshe mándi bolyp kórinetin ózindik mánerli sıpaty bar el ımıdjine qol jetkizýi. Qundylyqtan yqpal basymdyǵy halyqaralyq qarym-qatynasqa aýyr salmaq túsiretin qazirgi óte kúrdeli ýaqytta bul Qazaqstan kóshbasshysy qolǵa alǵan asa kúrdeli de jaýapty qyzmet, — dep túıindedi sózin saıasattanýshy.