Reseılik sarapshy Qazaqstan Prezıdenti Joldaýynyń áleýmettik basymdyqtaryna baǵa berdi
MÁSKEÝ. KAZINFORM – Prezıdent Qasym-Jomart Toqaevtyń Joldaýy qoǵam men memlekettiń ózekti máselelerin sheshýge bıliktiń barlyq tarmaǵyn jumyldyrýdy kózdeıdi. Bul týraly reseılik saıasattanýshy, Áleýmettik zertteýler sarapshylyq ınstıtýty departamentiniń dırektory Alekseı Vlasov Kazinform agenttiginiń Máskeýdegi menshikti tilshisine aıtty.
Qazaqstannyń Reseıdegi elshiligi Memleket basshysynyń Joldaýyn talqylaýǵa arnalǵan dóńgelek ústel uıymdastyrdy. Jıynda Alekseı Vlasov Prezıdent sózinde áleýmettik máselelerge erekshe kóńil bólingenin atap ótti. Onyń aıtýynsha, usynylǵan sharalar halyqtyń turmys sapasyn jaqsartýǵa baǵyttalǵan.
Sarapshy Joldaýda Qazaqstannyń jańa saıası kezeńge qadam basqany da aıqyn kórinetinin aıtty. Buǵan deıin elde shamamen bir jylǵa sozylǵan ózgerister boldy. Osy kezeńde jańa Konstıtýtsııa qabyldanyp, Quryltaı saılaýy ótti, memlekettik basqarý júıesinde qurylymdyq ózgerister jasalyp, birqatar mańyzdy memlekettik organdardyń basshylyq quramy jańardy. Endigi basty mindet – alǵa qoıylǵan maqsattardy is júzinde júzege asyrý.
– Joldaýdyń mazmunyna jalpy baǵa bersem, eń aldymen qoıylǵan maqsattardyń ómirsheńdigin atar edim. Basymdyqtardy aıqyndap qana qoımaı, olarǵa jetýdiń naqty joldaryn usyný da mańyzdy. Prezıdent sózinde «halyq» pen «ádildik» uǵymdaryna erekshe mán berilgeni nazar aýdartady. Bul memlekettiń azamattardyń naqty qajettilikterin eskerýge umtylatynyn kórsetedi, – dedi ol.
Alekseı Vlasov jastardy qoldaýdyń mańyzyn da atap ótti. Onyń pikirinshe, halyqtyń muqtaj toptaryna baǵyttalǵan áleýmettik saıasat pen qoljetimdi ınfraqurylym azamattardyń bolashaqqa degen senimin nyǵaıta alady.
– Aqsha – tek qural. Eń bastysy, memleket qarjyny qandaı jobalarǵa jumsaıtyny mańyzdy. Bul – joldar, mektepter, aýrýhanalar salý, sapaly medıtsınalyq kómek pen qoljetimdi bilim berý. Osyndaı ınvestıtsııalardyń arqasynda adamdar ekonomıkalyq damýdyń naqty nátıjesin sezine alady, – dedi sarapshy.
Vlasovtyń pikirinshe, Joldaýda aıtylǵan basymdyqtardy bir-birinen bólek qarastyrýǵa bolmaıdy. Bıýdjet jáne salyq saıasaty, shaǵyn jáne orta bıznesti damytýǵa jaǵdaı jasaý, el ishindegi ınvestıtsııalardy arttyrý sııaqty baǵyttardyń barlyǵy naqty áleýmettik jáne ekonomıkalyq nátıjege jetkizýi tıis.
Buǵan deıin túrkııalyq sarapshy Qasym-Jomart Toqaevtyń Joldaýy Qazaqstan damýynyń jańa baǵyttaryn aıqyndaıtynyn aıtqan edi.
