Reseılik «Mır» tólem júıesi ırandyq Shetab-qa qosyldy
ASTANA.KAZINFORM – Tólem júıesiniń resmı qosylý rásimi Tegeranda ótti, oǵan Iran Ortalyq bankiniń basshysy Mohammad Reza Farzın, sondaı-aq birneshe Iran bankteriniń menedjerleri qatysty. Tólem júıelerin biriktirý úsh kezeńde júzege asyrylady, dep habarlady Kazinform agenttiginiń menshikti tilshisi.
Dúısenbi kúngi resmı sharada ırandyq «Shetab» tólem júıesi men reseılik «Mır» júıesiniń elektrondy aqsha aýdarymdaryn qosý týraly kelisim kúshine endi, dep habarlaıdy Tasnim aqparat agenttigi.
Birinshi kezeńde Iran azamattary Reseıdiń barlyq aýmaǵyndaǵy bankomattardan rýbl alý úshin «Shetab» kartalaryn paıdalana alady.
Ekinshi kezeńde reseılik týrıster Iranda «Mır» kartalaryn paıdalana alady.
Úshinshi kezeń júzege asyrylǵannan keıin Iran azamattary Reseı dúkenderindegi tólem termınaldarynda Shetab kartalarymen satyp alýlar men qyzmetter tólemin jasaı alady.
Iran Ortalyq bankiniń basshysy Mohammad Reza Farzınniń aıtýynsha, eki tólem júıesi shilde aıynda Sankt-Peterbýrgte reseılik áriptesi Elvıra Nabıýllınamen kezdesýden keıin pysyqtalǵan josparlardan soń biriktirilgen.
— Bul jobany júzege asyrý arqyly biz eki el, Iran Islam Respýblıkasy men Reseı arasyndaǵy dollarsyzdandyrý jáne ózara esep aıyrysýdy jeńildetý baǵytynda úlken qadam jasaımyz, — dedi Farzın.
Sonymen birge ol 2024 jyldyń aıaǵynda Reseıde ırandyq tólem júıesiniń iske qosylǵanyn jarııalap, «Mır» jáne «Shetab» júıeleriniń ıntegratsııasy aıaqtalǵanyn habarlady. Iranda reseılik tólem júıesin engizý týraly kelissózder 2022 jyldan beri jalǵasyp kelgen.
Reseı premer-mınıstriniń orynbasary Aleksandr Novak 2022 jyldyń mamyrynda Reseı men Irannyń tólem júıelerin biriktirý josparyn jarııalady. Elder sonymen qatar ulttyq qarjylyq habar almasý júıelerin biriktirýdi talqylady.
Shetab — Iranda qoldanylatyn elektrondy banktik esep aıyrysý jáne avtomattandyrylǵan tólem júıesi. Ol 2002 jyly engizilgen.
