Reseılik Max messendjerinde 18 mln qoldanýshy tirkeldi

MÁSKEÝ.KAZINFORM - Platformada 18 mln. qoldanýshy tirkelgenin messendjerdiń baspasóz qyzmeti habarlady, dep jazady agenttik tilshisi.

Habarlamada Android operatsııalyq júıesine paıdalanýshylardyń 73%-y, iOS-qa - 26%-y tıesili ekeni, shamamen 1%-y kompıýterge arnalǵan nusqasyn qoldanatyny aıtylǵan. Eń kóp tirkelýler - Máskeý, Sankt-Peterbýrg, Samara, Krasnodar, Ekaterınbýrg jáne Qazan qalalarynda oryn alǵan.

Platforma iske qosylǵannan beri qoldanýshylar 200 mln-nan astam habarlama jiberip, shamamen 30 mln qońyraý shalǵan. Daýys qońyraýlarynyń ortasha uzaqtyǵy – 8 mınýt, toptyq qońyraýlardiki – 47,5 mınýtty quraıdy.

VK (Vkontakte) ázirlegen messendjer bıylǵy jyldyń 1 naýryzdan bastap testilik rejımde jumys istep keledi. Resmı iske qosylýy osy jyldyń qyrkúıek aıyna josparlanǵan.

Maýsym aıynda prezıdent V.Pýtın ulttyq messendjer qurý týraly zańǵa qol qoıdy. Osydan keıin Reseıdiń 6 óńiri mektep chattaryn Max-qa kóshirý boıynsha pılottyq jobaǵa endi.

Sankt-Peterbýrg gýbernatory A.Beglov barlyq qalalyq qyzmetter platformany paıdalanatynyn málimdedi. Memlekettik dýmanyń aqparattyq saıasat jónindegi komıtetiniń basshysy S.Boıarskıı ulttyq messendjerge ashyq syn aıtý azamatty sheteldik yqpal turǵysynan tekserýge sebep bolýy múmkin ekenin atap ótti.

Aıta keteıik, bıyl tamyzda Roskomnadzor Telegram men WhatsApp messendjerlerinde daýys qońyraýlar jasaý múmkindigin buǵattady. Buǵan alaıaqtarmen jáne terrorıstermen kúres sebep bolǵanyn túsindirdi.

Mediascope derekterine sáıkes, Reseıde WhatsApp-tyń aı saıynǵy aýdıtorııasy 97,5 mln adamǵa jetedi, bul – halyqtyń 79%-y.

Reseıde alaıaqtarǵa qarsy jańa joba júzege asyrylyp jatyr.

Osyǵan deıin Reseıde Telegram jáne WhatsApp arqyly qońyraýlarǵa shekteý qoıylǵany týraly jazdyq.