Aqtaý mańyndaǵy ushaq apaty. Reseılik kompanııa AZAL-ǵa ótemaqy tóledi
ASTANA. KAZINFORM — «AlfaStrahovanıe» Ázerbaıjan áýe kompanııasymen birlesip, zardap shekken jolaýshylardyń jáne qaza bolǵandardyń týystaryna ótemaqy tóledi, dep habarlaıdy Kazinform tilshisi.
Habarlamada táýekeldiń negizgi bóligin Reseıdiń Ulttyq qaıta saqtandyrý kompanııasy (RNRC) qaıta saqtandyrǵany aıtylǵan. Saqtandyrý shartynda sonymen qatar soǵys jáne terrorızm táýekelderi qamtylǵan. Tasymaldaýshynyń reıstegi jolaýshylar aldyndaǵy jaýapkershiligi 1999 jylǵy Monreal konventsııasymen retteledi. Alaıda, tólemderdiń tolyq somasy jarııalanbaıdy.
Reseılik BAQ kompanııa bas dırektorynyń avıatsııa jáne ǵaryshty saqtandyrý jónindegi orynbasary Ilıa Kabachnıkke silteme jasaı otyryp, jolaýshylarǵa keltirilgen shyǵyndy tóleý qazirdiń ózinde júrgizilip jatqanyn habarlaıdy. Onyń aıtýynsha, apatqa ushyraǵan AZAL-dyń Embraer 190 ushaǵy, sondaı-aq tasymaldaýshynyń jolaýshylar aldyndaǵy jaýapkershiligin «AlfaStrahovanıe» saqtandyrǵan, al táýekeldiń negizgi bóligin Reseı Ulttyq qaıta saqtandyrý kompanııasy qaıta saqtandyrǵan. Ushaqtyń tolyq saqtandyrý tólemi aqpan aıynda jasaldy.
Ol sondaı-aq kompanııanyń jol apatyna qatysty qyzmettik tergeýdiń aıaqtalýyn kútýdiń qajeti joq ekenin atap ótti. Apatqa qatysty tergeý jalǵasyp jatqanymen, saqtandyrýshylar tólemderdi júzege asyrý úshin jetkilikti aqparatqa ıe.
— Saqtandyrýshy retinde biz úshin ushaqtyń apatqa ushyraýynyń ózi mańyzdy fakt, bul kúmán týdyrmaıdy. Soǵys jáne terrorızm qaýpi de saqtandyrylǵandyqtan, áýekompanııa kez kelgen jaǵdaıda ótemaqy alady, — dep atap ótti Kabachnık.
«AlfaStrahovanıe» jolaýshylarǵa keltirilgen shyǵyndy jáne tasymaldaýshynyń jábirlenýshiler men olardyń zańdy ókilderiniń aldyndaǵy jaýapkershiligi úshin saqtandyrý tólemderin aǵymdaǵy jyldyń qańtarynda esepteı bastady, protsess jalǵasýda, dep habarlaıdy kompanııa.
Aıta keteıik, 25 jeltoqsanda Aqtaý mańynda Bakýden Groznyıǵa baǵyt alǵan AZAL jolaýshylar ushaǵy apatqa ushyrady. Bortta 67 adam, onyń ishinde bes ekıpaj múshesi bolǵan. Apat saldarynan 38 jolaýshy qaza taýyp, 29 adam aman qaldy.
Taıaýda Aqtaý mańyndaǵy ushaq apaty boıynsha tergeýdiń esebi jarııalandy.
Búgin Aqtaýdaǵy ushaq apatynan keıin Kólik oqıǵalaryn tergeý jónindegi arnaıy ortalyq qurylatyny belgili boldy.
Sonymen qosa ushaq apatynyń sebebi jyl sońyna deıin anyqtalatyny aıtyldy.