Reseılik keden organy qazaqstandyq ushqyshsyz ushý apparatyn ustady — feık
ASTANA. KAZINFORM – Memlekettik kirister komıteti Ushqyshsyz ushý apparattary jaǵdaıyn túsindirip, reseılik BAQ-taǵy jarııalanymdardy joqqa shyǵardy.
Komıtettiń dereginshe, 22 qyrkúıekte birqatar reseılik BAQ-ta reseılik keden organdarynyń Qazaqstan Respýblıkasynan ákelý kezinde ushqyshsyz ushý apparattaryn (UUA) ustaǵany týraly aqparat jarııalanǵan.
Memlekettik kirister komıtetiniń habarlaýynsha, bul derek shyndyqqa janaspaıdy jáne oqıǵanyń naqty mán-jaıy kórsetilmegen.
Іs júzinde atalǵan ushqyshsyz ushý apparaty bıylǵy jyldyń 13 maýsymynda «Jaısan» avtomobıl ótkizý pýnktinde QR UQK Shekara qyzmetiniń qyzmetkerleri tarapynan Reseı Federatsııasynan qajetti qujattarsyz ákelýge áreket jasaý kezinde ustalǵan.
— Belgilengen tártipke sáıkes júk eksporttyq baqylaý sharalaryn qoldaný úshin Memlekettik kirister organdarynyń qyzmetkerlerine berildi. Ýákiletti organǵa joldanǵan suraý salý nátıjeleri boıynsha UUA ákelýdiń ruqsat berý tártibine jatatyn arnaıy taýarlarǵa jatatyny rastaldy, — delingen habarlamada.
Osyǵan baılanysty materıaldar sotqa joldanyp, sot júk ıesin QR ÁQBtK-ge sáıkes kináli dep tanyp, ákimshilik aıyppul saldy.
Barlyq kózdelgen rásimder aıaqtalǵannan keıin júk jóneltiletin elge keri áketý mindettemesimen ıesine qaıtaryldy.
15 qyrkúıekte atalǵan taýar Reseı Federatsııasyna shyǵarylyp, bul týraly qoldanystaǵy ekijaqty tártipke sáıkes irgeles tarap tıisti túrde habardar etildi.
Memlekettik kirister komıteti zańnamada kózdelgen eksporttyq baqylaý rásimderin tolyq kólemde iske asyrdy.
Aıta keteıik, Memlekettik kirister komıteti 2026 jyldan bastap tsıfrlyq aktıvterge salynatyn salyqqa ózgerister engiziletinin málim etken edi.