Reseılik qazaq boksshysy AQSh-ta besinshi ret jeńiske jetti
ASTANA. KAZINFORM — Reseılik boksshy, Túmen qalasynan shyqqan qazaq Albına Moldajanova AQSh-ta kásipqoı rıngtegi besinshi jekpe-jegin merziminen buryn jeńispen aıaqtady, dep habarlaıdy Sports.kz.
21 tamyzda Kalıfornııa shtatynyń Temekıýla qalasyndaǵy Pechanga Resort Casino arenasynda Albına Moldajanova eshqashan jeńilip kórmegen ýrýgvaılyq Sheıla Fabıana Lızegangpen kezdesti.
Boksshy birinshi raýndtyń 81-sekýndynda qarsylasyn nokdaýnǵa túsirdi. Lızegang aýyrsynýdan edenge qulap, belgilengen ýaqytta ornynan tura almady. Osylaısha Moldajanova qarsylasyna kásibı mansabyndaǵy alǵashqy jeńilisin tartý etip, óziniń merziminen buryn jeńister serııasyn bes jekpe-jekke jetkizdi.
Osydan keıin bokstan Qazaqstan quramasynyń bapker Islam Abdraımov Albına Moldajanovany jeńisimen quttyqtady.
Ol Instagram jelisindegi storısinde reseılik boksshynyń jeńispen aıaqtalǵan jekpe-jeginen úzindi jarııalady.
Moldajanova kásipqoı bokstaǵy debıýtin 2025 jyldyń sáýirinde Chelıabınskide ótken «IBA.PRO 2» týrnırinde jasady. Al bıyl aqpan aıynda AQSh-qa kóship, amerıkalyq MVP (Most Valuable Promotions) promoýterlik kompanııasymen uzaq merzimdi kelisimshartqa otyrdy. AQSh-taǵy alǵashqy jekpe-jegin 24 maýsymda Kalıfornııanyń Indıo qalasynda ótkizip, meksıkalyq Klaýdııa Errera Lopesti ekinshi raýndta nokaýtpen jeńdi.
Áýesqoı boksta Albına Reseı áıelder quramasynyń sapynda 63 jáne 66 kelige deıingi salmaq dárejelerinde óner kórsetedi. Ol — 2024 jylǵy Reseı chempıony, 2024 jylǵy eresekter arasyndaǵy Eýropa chempıonatynyń kúmis júldegeri jáne 2023 jylǵy 22 jasqa deıingi jastar arasyndaǵy Eýropa chempıony. Sondaı-aq 2025 jylǵy álem chempıonatynda qola medal jeńip alǵan.
Aıta keteıik, buǵan deıin bokstan Azııa oıyndaryna qatysatyn Qazaqstan áıelder quramasynyń tizimi jarııalanǵan bolatyn.
