Reseılik ınvestorlar Qazaqstan ekonomıkasyna 30 mlrd dollar quıdy – Pýtın
ASTANA. KAZINFORM — Vladımır Pýtın Egemen Qazaqstan gazetine bergen suhbatynda Reseı men Qazaqstan – iri saýda seriktesteri ekenin atap ótti.
— Árıne, biz ekonomıka salasyna aıryqsha kóńil bólemiz. Sebebi Reseı men Qazaqstan — iri saýda seriktesteri. Elderimiz birneshe jyl qatarynan eksport pen ımport kóleminiń joǵary deńgeıin turaqty saqtap keledi. Alys-beristiń basym bóligin ulttyq valıýta arqyly júzege asyryp jatyrmyz. Reseıdiń Qazaqstan ekonomıkasyna salǵan kapıtalynyń jalpy kólemi — shamamen 30 mıllıard dollar. Al Qazaqstandaǵy sheteldik kapıtaly bar zańdy tulǵalardyń 40 paıyzdan astamy — reseılik seriktestermen birlesip qurǵan kompanııalar. Respýblıkada Reseı ınvestorlarynyń qatysýymen 70-ke jýyq iri joba iske asyrylyp jatyr. Sonyń ishinde avtokólik qurastyrý, aýyr mashına jasaý, hımııa ónerkásibi jáne basqa da tehnologııalyq salalarǵa qatysty tyń jobalar bar. Sonyń arqasynda qazirdiń ózinde 60 myńnan astam jańa jumys orny ashyldy, — dedi Pýtın.
Vladımır Pýtın Reseıdiń bıznes ókilderi Qazaqstandaǵy seriktesterine balamaly jáne «taza» energetıka salasyna qajetti biregeı ázirlemeler men tehnologııalardy usynyp otyrǵanyn aıtty.
— Eki eldiń energetıka salasyndaǵy yntymaqtastyǵy da qarqyndy damyp keledi. Qazaqstannyń álemdik naryqqa baǵyttalǵan munaı eksportynyń 80 paıyzdan astamy Kaspıı qubyr konsortsıýmy (KQK), ıaǵnı Reseı aýmaǵy arqyly ótedi. Respýblıkany energııamen turaqty qamtamasyz etý úshin «Gazprom» kompanııasynyń qatysýymen ulttyq gaz tasymaldaý ınfraqurylymyn ońtaılandyrýdy jáne keńeıtýdi josparlap otyrmyz. Sonymen qatar Reseıdiń bıznes ókilderi Qazaqstandaǵy seriktesterine balamaly jáne «taza» energetıka salasyna qajetti biregeı ázirlemeler men tehnologııalardy usynyp otyr, — dedi ol.
Eske salsaq Vladımır Pýtın Qazaqstanǵa memlekettik saparmen keletini týraly jazǵan edik.
