Reseılik ǵalymdar dınozavrdyń jańa túrin anyqtady

ASTANA. KAZINFORM — Dınozavrdyń jańa túri «Manıpýlonıks» dep atalady. Ol óziniń erekshe tyrnaǵyn týystarynyń jumyrtqalaryn urlaý úshin paıdalanǵan, dep habarlaıdy RIA Novostı. 

Bul týraly Reseı ǵylym akademııasy Borısıak atyndaǵy paleontologııalyq ınstıtýtynyń dırektory Alekseı Lopatın málimdedi.

— Manıpýlonıkstiń aldyńǵy qysqa aıaqtary erekshe qyzmet atqardy. Ol úlken tyrnaq pen birneshe qosymsha tikenektiń kómegimen úlken dınozavrlardyń jumyrtqalaryn tesip, tabandarynda ustaǵan, — deıdi ǵalym.

RǴA professory Aleksandr Averıanovtyń aıtýynsha, buryn úlken tyrnaq dınozavrǵa termıtter men jándikterdi jerden alý úshin berilgen. Olar kól men ózen janynda ómir súrgen.

— Bizdiń jańa rekonstrýktsııamyzǵa sáıkes, manıpýlonıks jáne onyń týystary jumyrtqa jeýge mamandanǵan túngi kishkentaı jyrtqyshtar boldy, — deıdi A. Averıanov. 

Mınıatıýralyq jyrtqysh dınozavrdyń qańqasyn paleontologııalyq ınstıtýttyń qyzmetkeri Valerıı Reshetov Mońǵolııadaǵy Gobı shólindegi Germın-Tsavtyń Borly jerinde birlesken keńestik-mońǵol paleontologııalyq ekspedıtsııasynyń jumysy kezinde tapty.

Eske sala keteıik, Italııa taýlarynda myńdaǵan dınozavr izi tabyldy. Ǵalymdar bul izderdiń paıda bolǵanyna shamamen 210 mıllıon jyl bolǵan dep eseptedi.