Reseı jáne sheteldik BAQ Qasym-Jomart Toqaevtyń Máskeýge sapary jaıynda ne jazdy – sholý
ASTANA. KAZINFORM – Buqaralyq aqparat quraldary Qazaqstan Prezıdenti Qasym-Jomart Toqaevtyń Reseıge memlekettik saparyn jan-jaqty talqylap jatyr. Osyǵan oraı sheteldik BAQ ne jazyp, Qazaqstannyń kópvektorlyǵy jaıynda ne aıtyp jatqanyn Kazinform agenttiginiń sholýynan oqyńyzdar.
Memlekettik sapar qarsańynda «Rossııskaıa gazeta» basylymynda Qazaqstan Respýbılkasynyń Prezıdenti Qasym-Jomart Toqaevtyń maqalasy «Máńgilik dostyq – halyqtarymyzǵa jol silter temirqazyq» degen taqyryppen jaryq kórdi. Maqala keńinen qyzyǵýshylyq týǵyzdy: kóptegen reseılik BAQ basty dáıeksózder keltirip, elderimizdiń halyqtarynyń tarıhı jaqyndyǵyna, sondaı-aq ekijaqty yntymaqtastyqtyń strategııalyq mańyzdylyǵyna erekshe kóńil bóldi.
«Nezavısımaıa gazeta» Qazaqstan Prezıdentiniń maqalasyn talqylaı kele, jarııalanymnyń úndestiligine jáne negizgi ekpinge nazar aýdardy.
Qasym-Jomart Toqaev Qazaqstan men Reseı halyqtarynyń tarıhı jaqyndyǵyn taǵy da mán berip, ǵasyrlar boıy ıyq tirestire ómir súrip, qýanyshtty da, synaqty da bóliskenin, Eýrazııanyń ortaq mádenı keńistigin qalyptastyrǵanyn atap ótkenin eske salady.
Qazaqstan men Reseıdiń syrtqy saıasattaǵy baǵytynyń ózgermeıtindigine aıryqsha ekpin berilgen. Qazaqstan Táýelsizdik alǵan sátten beri Reseımen dostyq qarym-qatynastardy nyǵaıtýǵa zor mańyz berdi. Bul syrtqy saıasattyń basymdyqtaryn aıqyndaıtyn barlyq tujyrymdamalyq qujattarda júıeli túrde bekitilip otyrdy.
Toqaev kúrdeli halyqaralyq jaǵdaı aıaıasynda eki memleket strategııalyq seriktestigine nazar aýdartyp, ony Eýrazııalyq qaýipsizdik júıesin qalyptastyrýdaǵy basty element retinde ataıdy.
Qasym-Jomart Toqaev eki memlekettiń ekonomıkalyq baılanystarynyń ózara sharttylyǵyn rastaıtyn tsıfrlardy eske saldy: «Bizdiń taýar aınalymymyz senimdi túrde ósip, 30 mlrd dollar shegine jaqyndap qaldy... Jalpy ınvestıtsııa kólemi 50 mlrd dollardan asatyn 170-ke jýyq birlesken joba Qazaqstan men Reseıdiń ónerkásiptik kooperatsııasynyń negizi sanalady».
Sondaı-aq reseılik basylym kólik-logıstıka salasyndaǵy ózara is-qımyldyń tereńdeýine nazar aýdardy. Qazaqstan aýmaǵy arqyly ótetin 13 halyqaralyq kólik dálizi (bes temirjol jáne segiz avtomobıl joly) Azııa men Eýropa arasyndaǵy qurlyqtaǵy júk tasymalynyń shamamen 85 paıyzyn qamtamasyz etedi. Al Qazaqstan men Reseıdiń ólshemderi men geografııalyq ornalasýyn eskerer bolsaq, tranzıttik baǵyttar jáne tıisti ınfraqurylymnyń odan ári damýy búkil Eýrazııanyń turaqty kólik baılanysyn qamtamasyz etý úshin zor mańyzǵa ıe.
Reseıdiń jetekshi aqparattyq agenttigi TASS Qazaqstan Prezıdenti Qasym-Jomart Toqaevtyń Reseı Federatsııasyna jasaǵan sheteldik saparlarynyń statıstıkasy men hronologııasyn qamtıtyn saraptamalyq materıal jarııalady. Maqalada Memleket basshysynyń barlyq 22 sapary jan-jaqty sıpattalyp, saparlardyń nátıjeleri, negizgi kezdesýler men jetistikter, sondaı-aq olardyń Qazaqstan men Reseı arasyndaǵy ekijaqty qatynastardy nyǵaıtýdaǵy róli atap ótilgen.
– Qasym-Jomart Toqaev Qazaqstan Prezıdenti retinde alǵash ret 2019 jylǵy 3-4 sáýirde reseılik kóshbasshy Vladımır Pýtınniń shaqyrýymen Máskeýge keldi. Reseıge resmı sapar onyń Memleket basshysy qyzmetine kiriskennen keıingi alǵashqy sheteldik sapary boldy. 3 sáýirde ótken kelissózder barysynda eki eldiń kóshbasshylary Reseı-Kazaqstan qatynastarynyń ártúrli máselesin, Eýrazııalyq ıntegratsııa perspektıvalaryn jáne aımaqtyq kún tártibin talqylady. Prezıdentter Qazaqstan men Reseı qatynasyndaǵy burynǵy saıası baǵytty jalǵastyrýǵa jáne jańa birlesken jobalardy iske asyrýǵa nıetti ekendikterin atap ótti, - delingen maqalada.
Materıal elimizdiń Prezıdenti osy jyldyń mamyr aıynda Máskeýge jasaǵan saparyn eske alýmen túıindelgen.
– 2025 jylǵy 8-9 mamyrda Qasym-Jomart Toqaev Uly Otan soǵysyndaǵy Jeńistiń 80 jyldyǵyna arnalǵan saltanatty is-sharalarǵa qatysý úshin Máskeýde boldy. Qazaqstan Prezıdenti 8 mamyrda Venesýela Prezıdenti Nıkolas Madýromen, Mıanmanyń Premer-mınıstri Mın Aýn Hlaınmen jáne Serbııa Prezıdenti Aleksandr Výchıchpen kelissózder júrgizdi. 9 mamyrda Qyzyl alańda Jeńis sherýine qatysty, odan keıin basqa memleket basshylarymen birge Aleksandrov baqshasynda Belgisiz soldattyń eskertkishine gúl shoǵyn qoıdy. Saltanatty is-sharalar aıaqtalǵannan keıin Reseı Prezıdenti Vladımır Pýtın Qasym-Jomart Toqaevqa ákesi – gvardııa serjanty Kemel Tokaevtyń Reseı Qorǵanys mınıstrliginiń arhıvinen tabylǵan áskerı nagradasyn tabystady, - dep eske alady TASS.
Qazaqstan Prezıdenti Qasym-Jomart Toqaevtyń Reseıge memlekettik saparynyń BAQ-ta jarııalanymdarmen bastalýynyń sımvolıkalyq, sonymen birge nyshandyq máni bar. Máskeýge bet alǵan Memleket basshysynyń ushaǵyna Reseıdiń Sý-35 joıǵysh ushaqtary memlekettik shekaradan bastap qaptaldasa ushty.
Prezıdent Toqaevty Máskeýde qalaı qarsy alǵanyn Life RU basylymy jazdy. Vnýkovo-2 áýejaıynda joǵary mártebeli qonaqty qarsy alý úshin Máskeý garnızonynyń qurmetti qaraýyly sapqa turǵyzylyp, áskerı orkestr eki eldiń ulttyq ánurandaryn oryndady.
RIA Novostı Qasym-Jomart Toqaevtyń Máskeý memlekettik halyqaralyq qatynastar ınstıtýtynyń (MMHQI) stýdentterimen kezdesýin jazdy.
– Prezıdent MMHQI stýdentterimen áńgimelesti. Qazaq tilinde qótken áńgimelesý barysynda stýdentter Qasym-Jomart Toqaevqa MMQHI-da onyń eńbekterinde baıandalǵan dıplomatııa men ashyqtyq qaǵıdattary oqytylatynyn aıtty, - delingen habarlamada.
– Túrli elder týraly, onyń ishinde Reseıdiń burynnan kele jatqan odaqtasy Qazaqstan jaıynda kóp maǵlumat bilý Sizderge keıin jumysqa ornalasýǵa, sondaı-aq álemde jáne óńirlik deńgeıde básekege qabiletti maman bolýǵa kómektesedi, - dedi Prezıdent.
Gazeta RU kezdesýge qatysqan stýdenttiń «Reseı men Qazaqstan – máńgilik dostyqtyń qos qanaty dep esepteımiz. Eki eldi, eki halyqty rııasyz, shynaıy dostyq qarym-qatynas baılanystyrady», - degen sózin erekshelep berdi.
Toqaev Máskeýde: Dostyq pen strategııa arasyndaǵy teńgerim
The Times of Central Asia Qazaqstan men Reseı arasyndaǵy qatynastardy jan-jaqty strategııalyq seriktestik jáne odaqtastyq deńgeıine kóterý týraly deklaratsııanyń qol qoıý máselesin kóterdi. Bul qadamdy Prezıdent Toqaev «ekijaqty qatynastardaǵy jańa dáýirdiń bastalýy» dep atady.
Toqaevtyń Máskeýge sapary Qazaqstannyń Reseımen qatynastardaǵy teńgerimdi saqtaýǵa baǵyttalǵan úzdiksiz kúsh-jigerin, sonymen qatar álemdik ózge de derjavalarmen baılanystardy damytýǵa da kóńil bólinýin pash etetindigi atap ótiledi. Astana úshin bul teńgerimdi saqtap qalý syrtqy saıasattyń ǵana maqsaty emes, sonymen qatar kúnnen-kúnge polıarlanǵan álemde onyń jeke ereksheligin aıqyndaıtyn basty qaǵıdaǵa aınaldy.
Gazeta RU Reseı Prezıdentiniń baspasóz hatshysy Dmıtrıı Peskovtyń Reseıdiń Qazaqstanmen qatynastardy jan-jaqty strategııalyq seriktestik deńgeıine kóterý týraly deklaratsııaǵa úlken mán beretinin aıtqan sózin keltiredi.
– Biz óte úlken mán beretin bul qujatty asyra baǵalaý asa qıyn, - dedi Kreml ókili.
SNG ınternet-portaly Qazaqstan men Reseı kóshbasshylarynyń beıresmı kezdesýi týraly jazdy. Kezdesý Kremldegi Senat saraıynyń Ókildik kabınetinde ótken.
Habarlamada sapardyń mańyzdylyǵy atap ótiledi. Reseı Prezıdenti Vladımır Pýtın jaqyn, bolashaq jáne alys orta merzimdi perspektıvalarǵa arnalǵan josparlar jasalatynyn málimdedi.
Qazaqstan Prezıdenti Qasym-Jomart Toqaev Astana men Máskeý arasyndaǵy strategııalyq seriktestik jáne odaqtastyq qarym-qatynastardyń mánin atap ótti.
– Biz túıispeıtin, birge jumys istemeıtin birde-bir sala joq. Memleketterimiz arasynda aıta qoıarlyqtaı qandaı da bir másele joq. Eger olar paıda bolsa, bul tabıǵı nárse. Olar aldymen memleket basshylarynyń jáne árıne, úkimetterdiń kúsh-jigeri arqyly sheshiledi, - dep atap ótti Qazaqstan Prezıdenti.
RIA Novostı Kremldegi kezdesýdiń shamamen úsh saǵatqa sozylǵanyn atap ótedi.
Life RU basylymynyń atap ótýinshe, beıresmı kezdesýden keıin Vladımır Pýtın Qasym-Jomart Toqaevty Kremldegi Senat saraıynan jeke ózi shyǵaryp salyp, tipti baspaldaqta da kóshbasshylar ózara qyzý pikir almasýdy jalǵastyrǵan.
– Kremldiń baspasóz qyzmeti jarııalaǵan kadrlardan kórinip turǵandaı, Memleket basshylary qoshtasýǵa asyqqan joq. Pýtın Toqaevty kólikke deıin shyǵaryp saldy. Qoshtasqanda Prezıdentter myqty qol alysyp, sál qushaqtasý arqyly Máskeý men Astana arasyndaǵy dostyq qarym-qatynastardy rastady, - delingen maqalada.
«Izvestııa» gazeti sapardyń negizgi kún tártibinen bólek, Reseı men Qazaqstannyń basqa da yqpaldastyq baǵyty – ǵaryshtyq yntymaqtastyq jaıyn atap ótti. Búginde «Baıterek» jobasy daıyndyqtyń sońǵy kezeńine ótti. Bıyl sáýir aıynda «Soıýz-5» zymyran tasymaldaǵyshyn ushyrýdyń alǵashqy synaǵy jeltoqsan aıynda ótetini aıtylǵan bolatyn. Jańa ǵaryshtyq zymyran keshenin tolyqqandy paıdalaný 2028 jylǵa josparlanǵan.
Prezıdent Qasym-Jomart Toqaevtyń memlekettik saparynyń ekinshi kúni Aleksandrov baqshasyndaǵy Belgisiz soldattyń eskertkishine gúl shoǵyn qoıýdan bastaldy. Pervyı kanal-dyń habarlaýynsha, gúl shoǵyna Qazaqstan týynyń túsimen birdeı taspa baılanǵan.
Resmı kelissózderdiń ashyq bóligi kezinde Pýtın Toqaevtyń kelesi jyly Qazaqstan saparmen kelý usynysyn qabyl aldy. Bul jaıynda reseılik Bıznes Online basylymy jazdy.
Snob.ru deklaratsııa qol qoıýdyń mańyzdylyǵyn atap ótedi.
– Osynaý negizgi qujatta óńiraralyq jáne shekara mańy yntymaqtastyqty odan ary keńeıtý jáne nyǵaıtý jónindegi josparlardyń kórinis tapqany sózsiz, - dedi Reseı Prezıdenti.
Qazaqstan Prezıdenti deklaratsııanyń tarıhı mańyzy bar ekenin aıtty. Ol qujat eki el halyqtary arasyndaǵy «ózara senimniń berik ekenin jáne keń aýqymdy yntymaqtastyqtyń bolashaǵyn» kórsetetinin atap ótti.
Kelissóz qorytyndysy boıynsha qol jetkizilgen ýaǵdalastyqtar jaıynda RIA Novostı jazdy.
Deklaratsııadan bólek 2030 jylǵa deıingi ekonomıkalyq yntymaqtastyq baǵdarlamasy, tranzıttik tasymaldar men kólik qaýipsizdigi jónindegi, ǵaryshtyq zymyran keshenderin synaý salasyndaǵy yntymaqtastyq týraly kelisimderge qol qoıyldy. Sonymen qatar, Máskeý men Astana Aqtaýda Reseıdiń Bas konsýldyǵyn ashýǵa ýaǵdalasty. Jalpy, 10-nan astam qujat qabyldandy. Aldaǵy ýaqytta Reseı, mysaly, Qazaqstannyń soltústik jáne shyǵys oblystaryn gazben qamtamasyz etýdi keńeıtip, sırek kezdesetin metalldar óndirý boıynsha birlesken jumystardy jolǵa qoıýdy josparlap otyr.
Kommersant qoǵamdyq-saıası basylymy Vladımır Pýtınniń adamnyń kúsh-qýaty nede ekenin túsindiretin «qazaq danalyǵyn» tilge tıek etti.
– Qyrannyń kúshi – qanatynda, adamnyń kúshi – dostarynda. Reseı Qazaqstanmen dostyq qatynasty joǵary baǵalaıdy, - dedi Vladımır Pýtın.
Jalpy, sapar nátıjeleri eki el eń aýqymdy mindetterdi birlesip sheshýge daıyn ekenin, halyqtarynyń múddesi úshin senimdi túrde alǵa jyljýdy maqsat etetinin kórsetti. Toqaev sapary Qazaqstan men Reseı arasyndaǵy odaqtastyqtyń jańa kezeńge – kemel, pragmatıkalyq jáne bolashaqqa baǵyttalǵan kezeńge ótkenin kórsetti.
Bul kezeńde basty resýrs saıası erik-jiger jáne damý jolyndaǵy ózara umtylys bolyp qalmaq.
– Qazaqstan – Reseıdiń odaqtasy, strategııalyq seriktesi jáne tatý kórshisi. Biz bul elmen dostyqqa, ózara senim men qurmetke negizdelgen kópjosparly jáne teńquqyly qarym-qatynas quryp jatyrmyz. Qazaqstandyq áriptesterimizben berik, ýaqyt synynan ótken baılanystardy shynaıy baǵalaımyz. Mol ortaq tarıhymyzben, ózara kómek kórsetý men qoldaý dástúrlerimizben, mádenı, rýhanı jáne adamgershilik baılanystarymyzben maqtanamyz. Osy negizde biz saıasatta, ekonomıkada jáne gýmanıtarlyq salada ózara tıimdi yntymaqtastyqty nyǵaıtýǵa jáne keńeıtýge birlesip umtylamyz, - dedi Vladımır Pýtın Máskeýdegi kelissózder barysynda.