Reseılik AvtoVAZ 23 myń kólikti keri qaıtaryp alyp jatyr
ASTANA. KAZINFORM — AvtoVAZ qosymsha jabdyqty ornatý úshin kólikterin jappaı keri qaıtaryp jatyr. Bul týraly Rosstandart habarlady.
Vedomstvonyń málimdeýinshe, 14 myńnan astam Lada Travel kóligi jedel qyzmetti shaqyrý júıesin basqarý blogynyń bolmaýyna baılanysty keri qaıtarý naýqanyna jatqyzylǵan.
— Keri qaıtaryp alý 2021 jyldyń qazany men 2023 jyldyń qarashasy aralyǵynda satylǵan 14 024 Lada Travel kóligin qamtıdy, qosymshaǵa sáıkes VIN kodtary bar. Kólikterdi keri qaıtarýǵa jedel shaqyrý júıesin (SVEOS) basqarý blogynyń joqtyǵy sebep bolyp otyr, — delingen habarlamada.
Budan basqa, AvtoVAZ shuǵyl shaqyrý júıesin basqarý blogy men qaýipsizdik jastyqshasy júıelerin basqarý blogynyń joqtyǵyna baılanysty 9 myńǵa jýyq Lada Legend kóligin keri qaıtaryp alǵanyn habarlady.
— Qosymshaǵa sáıkes VIN kodtary bar, 2021 jyldyń 31 qazany men 2024 jyldyń 2 mamyry aralyǵynda satylǵan 8 912 Lada Legend kóligi keri qaıtaryp alýǵa jatady. Kólikterdi keri qaıtarý sebebi: «ERA-GLONASS» apattyq áreket etý júıesin basqarý blogynyń jáne qaýipsizdik jastyqshasy júıesin basqarý blogynyń bolmaýy, — dep habarlady Rosstandart.
AvtoVAZ keri qaıtaryp alý baǵdarlamasyna jatatyn avtokólikterdiń ıelerin habardar etip otyr.
Ieleri sondaı-aq ýákiletti dılerdiń habarlamasyn kútpesten, Rosstandart saıtynda ózderiniń kóliginiń VIN-kodyn osy keri qaıtaryp alý baǵdarlamasy aıasyndaǵy avtomobılder tizimimen salystyrý arqyly óz kóliginiń keri shaqyrýǵa jatatyn-bolmaıtynyn anyqtaı alady.
Barlyq jumystar tegin júrgiziledi.
Buǵan deıin Volkswagen dıspleı aqaýyna baılanysty 60 myńnan asa elektromobıldi qaıtaryp alatynyn jazǵan edik.