Reseılikterge JSN SMS-habarlama arqyly jiberiletin boldy – mınıstr

ASTANA. QazAqparat – Qazaqstandyqtarǵa, sonyń ishinde shetelden kelip jatqan azamattarǵa daıyn bolǵan jeke sáıkestendirý nomerin (JSN) alý úshin Halyqqa qyzmet kórsetý ortalyǵyna qaıta barýdyń qajeti joq. Daıyn JSN SMS-habarlama retinde uıaly telefonǵa keledi. Bul týraly QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy QazAqparat.

Búgin mınıstr «Jastar» saraıynda Astana ákimdigimen birge shuǵyl túrde ashylǵan Halyqqa qyzmet kórsetý ortalyǵynda boldy. Ortalyq Reseı azamattaryna qyzmet kórsetý maqsatynda uıymdastyryldy.

«Atalǵan Halyqqa qyzmet kórsetý ortalyǵy negizgi ortalyqtarǵa túsetin júktemeni azaıtý úshin ashylǵan bolatyn. Qazirgi ýaqytta óz otandastarymyzǵa birinshi kezekte, kedergisiz, shtattyq rejımde qyzmet kórsetilip jatqanyn atap ótkim keledi.

Reseı Federatsııasynan kelgen azamattar sanynyń kóptiginen, operatorlar uzyn-sonar kezekte turǵandardy qabyldap úlgermeýde.

Búgingi kúnge deıin jaǵdaı bylaı órbidi: Reseı azamattary HQKO-ǵa kelip, qujattaryn usynady, olardyń derekteri bazaǵa engizilgennen keıin qaıtyp, ekinshi kúni JSN alý úshin HQKO-ǵa qaıta barady. Bul olardyń da, HQKO operatorlarynyń da kóp ýaqytyn alady. Sonymen qatar, ǵımarattaǵy adam sanynyń kóptigine sebep bolady», - dep jady B.Mýsın Facebook-paraqshasynda.

Vedomstvo basshysynyń aıtýynsha, endi azamattar, sonyń ishinde reseılikter daıyn bolǵan JSN-dy alý úshin HQKO-ǵa barmaıdy. JSN olardyń uıaly telefondaryna SMS retinde keledi.

«Endi JSN alýǵa ótinish bergen adamdarǵa ekinshi ret kelýdiń qajeti joq, JSN olardyń telefon nómirine 1414 qyzmetinen SMS-habarlama túrinde jiberiletin bolady. Bul daıyn JSN alý úshin kezekte turǵan barlyq HQKO klıentterine qatysty. Bul óz kezeginde adamdardyń Halyqqa qyzmet kórsetý ortalyqtarynda shoǵyrlanbaýynyń aldyn alady.

Búgin biz ekinshi deńgeıli bankterge JSN derekter bazasynda beriletini týraly aqparatty jetkizemiz, nómirdi engizgen kezde kez-kelgen azamat týraly aqparat avtomatty túrde shyǵatyn bolady.

HQKO qyzmetkerlerine eshteńege qaramastan, jedel túrde qyzmet atqaryp jatqandary úshin alǵys aıtqym keledi.

Biz jaǵdaıdy baqylaýda ustaımyz» - dedi mınıstr.