Reseılikterge saýsaq tańbasy bar sheteldik tólqujattar 1 shildeden berile bastaıdy
ASTANA. 5 qańtar. QazAqparat - Reseılikterge saýsaq tańbasy bar sheteldik tólqujattar 2013 jylǵy 1 shildeden berile bastaıdy. Bul týraly reselik «Jańalyqtar» agenttigi habarlady.
Jańa úlgidegi sheteldik tólqujattar berý týraly Jarlyqqa RF Prezıdenti Vladımır Pýtın qol qoıdy. Qujatqa sáıkes RF úkimeti úsh aı merzim ishinde zańnamalarǵa ózgerister jobasyn jasap, Memlekettik dýmaǵa engizýi tıis.
Jańa sheteldik tólqujatty alǵashqy bolyp Máskeý, Máskeý oblysynyń, Sankt-Peterbor jáne Lenıngrad oblysynyń turǵyndary alady. Jańa qujattar qaı merzimge beriletini ázirge naqtylanbaǵan.
Eski sheteldik tólqujattardy aýystyrýdyń qajeti joq - olar merzimi bitkenshe kúshinde bolady.
Reseıde saýsaq tańbasy bar sheteldik tólqujattardy engizý máselesi 2005 jyldan beri talqylanyp keledi. 2011 jyly qujattyń tájirıbelik úlgisin jasaý bastalǵany jarııalanǵan bolatyn.
Sońǵy birneshe jylda Reseıde elektrondy chıpi bar sheteldik tólqujat engizildi, ony «bıometrııalyq» dep te ataıdy. Onda qaǵazdaǵy málimetterdiń bári elektrondyq túrde saqtalady. Tólqujatty chıppen nemese chıpsiz alý ár adamnyń óz erkinde. Elektrondy qujat jalǵan qujat jasaýdan jaqsy qorǵalǵan, al ondaǵy aqparat kedende tezirek óńdeledi.
