Reseılikterdiń kóptep kelýi el ekonomıkasyna qalaı áser etti
«Reseıde ishinara mobılızatsııa jarııalanǵanyna 2 aı ótti. Bul jaǵdaı Qazaqstan ekonomıkasyna qalaı áser etti? Jaǵymdy jáne jaǵymsyz jaqtaryn aıtyp berseńiz. Saldary boldy ma?» - dep surady jýrnalıst.
«Ázirshe onyń jaǵymsyz jaǵyn aıta almaımyn. Buǵan deıin munyń ýaqytsha qubylys ekenin aıtqan edim. Shynynda solaı boldy. Mobılızatsııanyń alǵashqy eki aptasynda 200 myń reseılik bizdiń elden shyǵyp ketti. Olar Qazaqstan aýmaǵyn tranzıt retinde paıdalanǵan. Qalǵandary elde 90 kún bola alady. Olardyń osyndaı quqyǵy bar.
Áýelde áleýmettik ınfraqurylymǵa salmaq tústi. Keıin ol másele sheshildi. Qazaqstan óziniń qonaqjaılyǵyn kórsetti», - dedi mınsıtr.
Onyń paıymynsha, atalǵan qubylystyń Qazaqstan úshin jaǵymdy jaǵy da bolǵan.
«Menińshe, joǵary bilikti mamandardy talap etetin salalarda ádil básekelestik kúsheıdi. Mysalǵa IT salasyn alýǵa bolady. Koronavırýs pandemııasy bul salanyń damýyna serpin berdi. Sondaı-aq bizge Reseı, Belarýs jáne Ýkraınanyń IT-mamandary aǵyldy. Meniń oıymsha, bul ekonomıkanyń damýyna oń áser etedi. Onyń ishinde tsıfrlandyrý da bar.
Sonymen qatar, kórshi elden kelgen mundaı aǵyny ishki naryqtaǵy tutynýshylyq suranysqa áserin tıgizedi. Árıne, baǵaǵa áser etedi. Basynda dúrbeleń boldy. Keıin jaǵdaı turaqtaldy. Meniń oıymsha, saýda balansyna da oń áserin tıgizdi. Óıtkeni, adamdar osynda kelip, túrli qyzmetter men taýarlardy satyp alady, demek, bizdegi qyzmetter eksporttaldy. Ony biz osynda reseılikterge sattyq. Muny óz aýmaǵymyzdaǵy qyzmet kórsetý ekporty deıdi. Bul da jalpy saýda balansyna oń áserin tıgizdi», - dedi Álibek Qýantyrov.
