Reseılikterden qutylyp, bizdiń shekarashylarǵa tutyldy
ASTANA. QazAqparat - Qostanaı shekara otrıadynyń jedel kezekshisine Reseı Feleratsııasynyń Federaldyq qaýipsizdik qyzmeti Shekara qyzmetiniń Qorǵan jáne Tıýmen aýmaǵy boıynsha shekaralyq basqarmasynyń jedel kezekshisinen telefon arqyly aqparat kelip tústi.
Aqparatta Reseı aýmaǵynda ornalasqan Tselınnoe eldi mekeninen Qazaqstan jaqtaǵy Zagarnınka eldi mekenine qaraı ketken adam iziniń tabylǵany týraly aıtyldy. Іz eki saǵattaı buryn túsken, ıaǵnı «sýyp úlgergen».
Bul aýmaq Qostanaı shekara otrıadynyń Keńaral shekara zastavasynyń jaýapkershiliginde. Qazaqstandyq shekarashylardyń jedel qımyldarynyń nátıjesinde arada kóp ýaqyt ótpeı, Meńdiqara aýdanynyń Zagarınka eldi mekeniniń mańynan shekara buzýshy, 43 jastaǵy Gennadıı esimdi Qazaqstan azamaty ustaldy. Ol óziniń osyndaı qadamǵa barǵandyǵyn Memlekettik shekaradan ótýge ruqsat beretin qujattarynyń joǵalǵandyǵymen túsindirdi. Alaıda, bul qylmystyq jaýapkershilikten qutqaratyn sebep emes, dep habarlaıdy QR UQK ShQ baspasóz qyzmeti.
