Reseılikter Otyrar qaýynyna áýes- OQO
ASTANA. QazAqparat - Otyrar aýdany ákimi Erlan Aıtahanov Maıaqum, Baltakól aýyl okrýgterinde issaparmen bolyp, «Otyrar-Sút-Et» selolyq tutyný kooperatıvi men «Otyrar Agro ónimderi» JShS dıqandarymen kezdeskende kóptegen ıgi isterdiń atqarylyp jatqanyna kóz jetkizdik, dep jazady «Ońtústik Qazaqstan» gazeti.
Qazirgi tańda kooperatıv quramyna jergilikti «Serikbaı-B», «Meıirbek LTD», «Úsenov-N» jaýapkershiligi shekteýli seriktestikteri kiredi. Kooperatıv bıyl 190 gektar alqapqa «Jıenbaı» sortty qaýyny, 130 gektaryna jońyshqa, 100 gektaryna júgeri daqyldaryn ekken.Tyń tehnologııalardy paıdalaný arqyly mol ónimge qol jetkizgen sharýashylyqtyń ónimderine suranys joǵary bolyp otyr. Búginde Syr boıynyń sary torlama qaýyndaryn Reseıdiń Máskeý, Sankt-Peterbýrg qalalarynan kelgen kásipkerler ózderi tasymaldap áketýde. Máskeýdegi Domodedovo halyqaralyq áýejaıy men «Fýdsıtı» saýda ortalyqtarynda satylyp jatqan qaýyndar máskeýlikter men sheteldik qonaqtardyń súısinip jeıtin tańsyq astaryna aınalǵan. Sol sekildi Neva jaǵalaýyndaǵy «Lenıngradtyq óreńder de» Syr boıynyń qaýynynyń dámin tatýda.
Al, Baltakóldegi dıqandar ǵylymǵa negizdelgen, sońǵy ozyq tehnologııalardy paıdalanyp 104 gektar alqapqa tamshylatyp sýarý ádisimen pııaz egipti.
Dıqandar ár gektarynan 60 tonnadan ónim alýda. Bul ónimder kelisimshart boıynsha «Otyrar qoıma» JShS-niń qoımasynda saqtalady. Sonymen qatar, 50 gektar alqapqa tamshylatyp sýarý ádisimen kúzdik pııaz egilip bitti. Aýdan basshysy Erlan Qýanyshuly dıqandardyń ónimdi eńbegine rızashylyǵyn bildirip, jumystaryna tabys tiledi.
