Reseılikter Qazaqstanda qurastyrylǵan avtokólikterdi satyp alady
ALMATY. QazAqparat - Qazaqstandyq avtokólikter Reseı naryǵyna 2021 jyldan bastap jetkiziledi. Bul týraly «QazAvtoProm» kompanııasynyń strategııalyq josparlaý jónindegi dırektory Artýr Mıskarıan aıtty, dep habarlaıdy QazAqparat tilshisi.
Artýr Mıskarıannyń aıtýynsha, qazir Óskemende «AzııaAvto Qazaqstan» zaýyty salynyp jatyr. Ony 2021 jyly iske qosý josparda. Bul zaýyttyń óndiristik qýaty birinshi kezeńde 60 myń dana bolady, bul avtomobılderdi eksporttaýǵa múmkindik beredi.
«Zaýytty iske qosý arqyly qazaqstandyq avtomobılderdi Reseı naryǵyna shyǵaramyz. Búginde qazaqstandyq BıpekAvto - AzııaAvto kompanııasynyń Reseıde avtoortalyqtary bar. Ony qazaqstandyq menedjerler toby basqarady, biraq ázirge ol ortalyqta reseıde qurastyrylǵan kólikter satylady. Óskemendegi zaýyt iske qosylǵannan keıin, qazaqstandyq avtomobılder Reseı Federatsııasynda satyla bastaıdy. Bul týraly naqty kelisim bar», - dep tolyqtyrdy Artýr Mıskarıan.
Onyń aıtýynsha, Reseıdegi qazaqstandyq dılerlik dúkender jelisi negizinen Sibir men Qıyr Shyǵysta ornalasqan.
«Eger kólik satýdyń tıimdiligi týraly aıtatyn bolsaq, onda avtomobıldi Óskemennen Novosibirge, Ijevsk pen Tolıattıden Novosibirge jetkizgen áldeqaıda tıimdi. Osylaısha, kólik shyǵyndary azaıady. Reseılik tutynýshylar qazaqstanda qurastyrylǵan kólikterdi avtoortalyqtardan salystyrmaly baǵamen nemese sál tómen baǵamen satyp ala alady», - dep túsindirdi A.Mıskarıan.
Sonymen birge, spıker salyq turǵysynan eki eldiń kólikteri arasynda aıtarlyqtaı aıyrmashylyqtar bolmaıtynyn atap ótti.
«QazAvtoPromnyń» málimetine sáıkes, jyl basynan beri Qazaqstanda jalpy quny 229 mıllıard teńgeniń 33500 kólik qurastyryldy. Buǵan jeńil, júk kólikteri, avtobýstar, arnaıy kólikter men tirkemeler kiredi.
