Reseılikter Qazaqstan halqyn Birlik kúnimen quttyqtady
MÁSKEÝ. QazAqparat - Búgin, 1 mamyr kúni Reseı halqy kóktem men eńbek kúnin atap ótip jatyr. Kóktemniń osynaý shýaqty merekesi Reseıde halyqtyq serýender men kontserttemen ótkiziledi. Bul jolǵy mamyrdyń mamyrajaı merekesi de jyldaǵy dástúrden qalysqan joq, dep habarlaıdy «QazAqparat» HAA-nyń menshikti tilshisi.
Merekege oraı sherýler men mıtıngiler sondaı-aq Sankt-Peterbýrg, Ekaterınbýrg, Novosibir, Magnıtogorsk, Samar, Ýfa, Volgograd, Chelıabi, Omby jáne eldiń basqa da qalalarynda ótkizildi.
Alaıda eń iri sherý Reseı astanasynda uıymdastyryldy. «Birlik, yntymaqtastyq, eńbek - tabysty túrde damýdyń kepildigi» uranymen Qyzyl alańda ınjenerler, ónerkásiptegi qurylysshylar, muǵalimder, dárigerler, ǵalymdar, memlekettik qyzmetshiler, jumysshylar, kólik jáne áleýmettik salanyń mamandary júrip ótti.
Merekelik sherýde sonymen birge Máskeý meri Sergeı Sobıanın, Memlekettik dýma men Máskeý dýmasynyń depýtattary, Táýelsiz kásipodaqtar federatsııasynyń basshysy Mıhaıl Shmakov, Máskeý kásipodaqtar federatsııasynyń tóraǵasy Mıhaıl Antontsev ta boldy.
Jalpy, merekelik sherýge 130 myń qatysýshy atsalysty.
Sherýdiń qatysýshylary ózderiniń merekelik kóńil-kúılerimen bólisip, qazaqstandyqtardy quttyqtap, jalpy meıram barsha eńbek adamdaryn biriktiretinin atap ótti.
«Kóktem merekesi - bul eńbek merekesi. Bul kúnde barlyq jumysshylar bas qosady. Shynaıy tilekpen barlyq Reseı men Qazaqstan halqyn birinshi mamyr merekesimen quttyqtaımyz», - dedi «Temirjol jáne qala kólikteri kolledji» kásipodaqtar uıymynyń tóraǵasy Valentına Pytaleva.
Sonymen birge, jıynǵa qatysýshylardyń bir bóligi qazaqstandyqtardy Birlik kúnimen quttyqtap, izgi tilekterin bildirdi.
«Máskeýdiń kásiptik bilim salasyndaǵy mamandary dostyq qarym-qatynastaǵy Qazaqstandy jáne ondaǵy pedagogtardy quttyqtaıdy. Jańa kásibı mamandardy daıarlaýda biz olarǵa tabys tileımiz. Birinshi mamyr kúni qos halyqqa da úlken mańyzǵa ıe. Tarıhı turǵyda - bul kún baýyrlas elderdiń birligi kúni. Sondyqtan, búkil Qazaqstan halqyn Birlik kúnimen shyn júrekten quttyqtaǵym keledi», - dep júrekjardy tilegin aıtty «Temir jol jáne qala kólikteri kolledjiniń» muǵalimi Vıktor Antsygın.
