Reseılikter qaı salada jumys isteı alady – mınıstrdiń jaýaby

ASTANA. QazAqparat – Ulttyq ekonomıka mınıstri Álibek Qýantyrov elimizge aǵylǵan kórshi elderdiń azamattary qaı salalarda jumys isteı alatyndyǵyn aıtty, dep habarlaıdy QazAqparat tilshisi.

«Menińshe, aıtarlyqtaı qysym bola qoımas. Óıtkeni, Qazaqstan zańnamasyna sáıkes, jumys oryndary birinshi kezekte ekonomıkamyz úshin qurylady. Árıne, sheteldikterdiń belgili bir deńgeıde kelýi bolady. Ol barlyq ýaqytta da bolǵan. Qazaqstandyqtar arasynda suranys bolmaǵandyqtan, gasterbaıterler kelip isteıtin jumys oryndary bar», - dedi ol Úkimet otyrysynan keıin BAQ ókilderiniń saýalyna oraı.

Onyń atap ótýinshe, atalǵan jumystardy ózge elderden keletin azamattar isteı alady.

«Qazaqstandyqtar istegisi kelmeıtin maýsymdyq jumystar, máselen, qurylys jumystary da jetkilikti. Gasterbaıterler qaı jerlerde jumys isteıtinin bilemiz jáne olar sol jerlerde isteı alady. Árıne, birinshi kezekte biz Qazaqstan azamattaryn jumysqa ornalastyrýdy oılaımyz. Al qalǵanynyń bári ekinshi satydaǵy máseleler», - dedi Álibek Qýantyrov.