Reseılikter bizden azyq-túlik satyp alady - SQO ákimi
ASTANA. QazAqparat - Soltústik Qazaqstan oblysyna jyl saıyn 80 myń týrıst keledi, dep habarlaıdy QazAqparat tilshisi.
Oblys basshysy Qumar Aqsaqalovtyń sózine qaraǵanda, atalǵan kórsetkish jyl ótken saıyn artyp keledi. «Reseılik týrıster kólderdiń jaǵasynda dem alǵandy jaqsy kóredi. Sosyn dalada shatyr quryp, birneshe kún demalyp ketetinder de az emes. Bizdiń maqsatymyz - ol adamdardyń qaýipsizdigin qamtamasyz etý. Árıne, demalatyn jerge baratyn joldardyń sapasy da jaqsy bolýy shart. Taza dárethana, usaq-túıek zattardy satatyn dúkender de bolǵan jón. Qazirgi kezde biz kólderdiń jaǵasynda birneshe avtokaravanıng (dóńgelekti úımen saıahattaý -avt.) ortalyqtaryn ashý máselesin pysyqtap jatyrmyz. Reseılikter Petropavlǵa da jıi keledi. Sol jerde azyq-túlik taýarlaryn satyp alyp ketedi. Sebebi bizde arzan. Akvaparkke barady, botanıkalyq saıajaıda qydyrady, saýda ortalyqtaryn aralaıdy», - dedi Q.Aqsaqalov Astanada ótken baspasóz máslıhatynda.
Ákimniń aıtýynsha, bıyl kúzde Petropavlda ótetin Qazaqstan men Reseıdiń shekara mańy forýmynda týrızm máselesi talqyǵa salynady. Atalǵan forýmǵa eki eldiń basshylary qatysady. «Týrızmdi damytý - óte mańyzdy másele. Árıne, eki jaqty týrızmdi damytý úshin joldardy qalpyna keltirý kerek. Máselen, Reseıde Qorǵan, Túmen men Ombyǵa baratyn joldardyń sapasy I-II kategorııaǵa deıin jaqsarady. Sonyń arqasynda bizge týrıster kóptep keledi. Mysaly, Aıyrtaý aýdanyna týrıster kóp barady. Reseı azamattary Shalqar men Imantaý kólderi jaǵasynda dem alǵandy jaqsy kóredi», - dep atap kórsetti Q.Aqsaqalov.
Aıta keteıik, búgin Astanada ótken baspasóz máslıhatynda Q.Aqsaqalov rýhanı jańǵyrý sharalary boıynsha esep berdi. Ákim ońtústikten kóship keletin jastarǵa úı salyp berýge daıyn ekenin jetkizdi.
