Reseılikter bir balany mektepke daıyndaýǵa qansha qarjy jumsaıdy
Ózge de postkeńestik elder sekildi negizgi shyǵyn kıim satyp alýǵa jumsalady. Oǵan mektep jáne sport formasy, sporttyq aıaq kıim men aksessýarlar kiredi. Sonymen birge sómke men oqý quraldaryn alý kerek. Reseılikter gıpermarketterde, marketpleısterde, bazarlar men mamandandyrylǵan dúkenderde saýda jasap jatyr.
Reseıdiń federaldyq zańnamasyna sáıkes, oqýshy kıimine qoıylatyn talaptardy ár mektep jeke belgileıdi. Biraq tutastaı alǵanda, kóptegen mektep iskerlik stıldegi kıimge basymdyq beredi.
Oqýshylarǵa sarafan, jaket, pıdjak, shalbar, klassıkalyq beldemshe, jeıde, blýzka, klassıkalyq aıaq kıim kııý usynylady. Sýyq mezgilde jempir, svıter kııýge bolady. Galstýkty ár oqýshy qalaýynsha taǵa alady. Sporttyq formaǵa fýtbolka, trıko, sholaq shalbar, kedy men krossovkalar kiredi.
Máselen, balaǵa reseılik zaýytta shyǵarylǵan kıim alý úshin tómendegi baǵalardy eskerý qajet: shalbar 1 500 rýblden, pıdjak – 3 200 rýblden, jeıde – 900 rýblden (kem degende ekeý alý kerek), kóılek 1 200 rýblden, jartylaı qystyq aıaq kıim – 4 800 rýblden, jempir 1450 rýblden bastalady, atalǵan kıimderge 13 950 rýbl qajet.
Qyzdar men uldarǵa arnalǵan sporttyq kıimderdiń baǵasy birdeı: sporttyq kostıýmder 1450 rýblden, fýtbolkalar – 390 rýblden, sholaq shalbarlar – 700 rýblden, kedy – 600 rýblden, krossovkalar 1 700 rýblden bastalady, aıaq kıimge arnalǵan sómke 150 rýbl turady. Osylaısha barlyǵy – 4 840 rýbl.
Qarapaıym mektep sómkesi kem degende 2000 rýbl turady, al ortopedııalyq sómkelerdi – 5500 rýblge tabýǵa bolady. Oqý quraldaryna taǵy 3500 rýbl qajet.
Oqýlyqtarǵa kelsek, belgilengen erejelerge sáıkes, mýnıtsıpaldy jalpy bilim beretin uıymdarda oqýlyqtar men oqý quraldaryn alý shyǵyndaryn memleket kóteredi. Alaıda keıbir jaǵdaılarda oqýshylar qosymsha oqý quraldary men jumys dápterlerin ala alady. Olardyń baǵasy 100-den 7 myń rýblge deıin sozylady. Bul erikti satyp alýlar bolǵandyqtan bizdiń esepke alynbaıdy.
Osylaısha, Reseıde bir balany mektepke daıyndaýǵa uldarǵa 24 290 rýbl, qyzdarǵa 28 140 rýbl jumsalady. Bul Qazaqstan Ulttyq Bankiniń qazirgi kýrsy boıynsha 118 292 jáne 137 041 teńge.
