Reseılikter Belarýs pen Qazaqstandy senimdi seriktes dep sanaıdy
ASTANA. QazAqparat - Reseılikter altynshy jyl qatarynan Belarýs pen Qazaqstandy postkeńestik keńistiktegi áldeqaıda senimdi seriktes jáne bul elderdi TMD-daǵy eń tabysty elder dep sanaıdy. Muny Qoǵamdyq pikirdi zertteýdiń búkilreseılik ortalyǵy saýalnamasynyń málimetteri aıǵaqtaıdy. Sonymen birge bul eki memlekettiń basshylary reseılikter senetin tulǵalar reıtınginde jáne orys tildi turǵyndar quqyǵynyń saqtalýyn qamtamasyz etý boıynsha reıtıngte kósh bastap tur, dep habarlady RIA Novostı.
Qoǵamdyq pikirdi zertteýdiń búkilreseılik ortalyǵy beısenbi kúni reseılikterdiń TMD elderine degen qarym-qatynasy boıynsha kezekti zertteýleriniń nátıjelerin usyndy. Áleýmettanýshylardyń tórt suraǵynyń árbirine respondentter eń kóbi úsh jaýap qana bere aldy.
"Reseılikterdiń Belarýs pen Qazaqstanǵa degen súıispenshiligi jyldan-jylǵa artyp keledi. Osylaısha, alty jyl qatarynan reseılikter TMD-ǵa múshe memleketterdiń arasynda osy eki eldi qol jetkizgen jetistikteri boıynsha kósh basyna qoıyp keledi", - delingen zertteý materıaldarynda.
Osylaısha, 2015 jyly saýalnamaǵa qatysqandardyń 72%-y Belarýsti, 50%-y Qazaqstandy sátti damyp kele jatqan el dep sanaıdy. Ótken jyly respondentterdiń sáıkesinshe 66% jáne 45% osyndaı jaýap bergen. Aıta ketý kerek, zertteý alǵash ret 2010 jyly júrgizildi. Ol kezde respondentterdiń 31% Belarýstiń qol jetkizgen jetistigi mol dep eseptese, 34%-y Qazaqstandy alǵa shyǵardy.
Belarýs pen Qazaqstan lıderleri de TMD elderiniń basshylary arasyndaǵy reıtıngtiń kóshin bastap tur. Saýalnamaǵa qatysqandardyń basym bóligi (63%) Belarýs prezıdenti Aleksandr Lýkashenkoǵa senetinin (ótken jyly - 61%), sonymen qatar Qazaqstan prezıdenti Nursultan Nazarbaevqa (45% reseılik, ótken jyly - 38%) senetinin aıtty. TMD elderiniń ózge prezıdentterine saýalnamaǵa qatysqandardyń onnan bir bóliginen azdaý respondentter daýys berdi.
Saýalnama 2015 jyly 22-23 qarasha aralyǵynda Reseıdiń 46 óńirinde júrgizildi. Oǵan 1600 adam qatysty. Statıstıkalyq dálsizdik 3,5%-dan aspaıdy.
