Reseılikter Astanadaǵy sıtýatsııalyq ortalyqtyń jumysymen tanysty
ASTANA. QazAqparat - Andreı Lýkın reseılik delegatsııaǵa elordada qalanyń barlyq salalarynda tártip qalaı ornaıtynyn aıtyp berdi, dep habarlaıdy Astana ákimdiginiń medıa ortalyǵy.
Astana qalasy ákiminiń orynbasary elordalyq ákimdiktiń sıtýatsııalyq ortalyǵynda Chelıabi oblysy gýbernatorynyń orynbasary Rýslan Gattarovpen jáne Ekonomıkalyq damý basqarmasynyń basshysy Anton Bahaevpen kezdesý ótkizdi.
Andreı Lýkın reseılik áriptesine mamandardyń jumysyn kórsetip, sıtýatsııalyq ortalyǵyna ekskýrsııa uıymdastyrdy.
«Bul jerde beınebaqylaý zaly bar. Onyń jumysyna 3000-ǵa jýyq beınekamera qosylǵan. Qazirgi ýaqytta qalada shahardaǵy barlyq beınekameralardy qosý boıynsha jumys júrgizilýde, jyl sońyna deıin olardyń sany 13 myńǵa deıin jetedi», - deıdi Astana qalasy ákiminiń orynbasary.
Ortalyqtyń jumysyna bas-aıaǵy 100-ge jýyq qyzmetker tartylǵan.
«Bizdiń operatorlar - ishki ister organdarynyń shtattaǵy qyzmetkerleri. Onymen birge bizde jumyspen qamtý baǵdarlamasy boıynsha qyzmet izdep kelgen adamdar da jumys isteıdi. Jumyspen qamtý ortalyǵy arqyly biz bos jumys oryndary týraly aqparatty jarııalap turamyz. Bul qyzmetkerlerdiń mindeti - qala ınfraqurylymynyń buzýshylyǵyn anyqtaý. Olar ashyq qudyqtar, qańǵybas ıtter, zańsyz jarnama syndy kemshilikter men zańbuzýshylyqtardy anyqtaıdy. Reglament boıynsha 350 shtattan tys jaǵdaı qarastyrylǵan. Operatorlarǵa osyndaı jaǵdaılardy anyqtaý qajet. Olardyń jumys ýaqyty 8 saǵatqa sozylady», - dedi Andreı Lýkın.
Sıtýatsııalyq ortalyqta elordalyq basqarmalar men departamentterdiń ókilderi esebinen qurylǵan arnaıy analıtıkalyq top jumys isteıdi. Olardyń mindetteri - elordada bolǵan jaǵdaılarǵa jedel áreket etý.
Reseıden kelgen bir top delegatsııa «109» qalalyq qyzmetiniń jumysymen tanysty.
«Biz 300-den astam baǵyt boıynsha jumys isteımiz. Bul tek jedel nemese shtattan tys jaǵdaılarǵa baılanysty áreket etý ǵana emes, sondaı-aq qalalyq uıymdar boıynsha jumys máseleleri: meken-jaı, telefon nómirleri, baılanys quraldary syndy anyqtamalyq aqparat. 6 aı ishinde 39 myńnan astam azamattyń ótinish-suraýy tirkeldi. Bizge kelip túsetin barlyq qońyraýlar jazylady», - dedi qyzmettiń qyzmetkerleri.
«Bir sóben aıtqanda «109» telefon nómiri qalanyń ámbebap qyzmet kórsetýshi mekemesi bolyp tabylady», - deıdi Chelıabi oblysy gýbernatorynyń orynbasary Rýslan Gattarov.
«Joǵaryda kórsetilgen qyzmetter boıynsha kómek qajet bolǵan jaǵdaıda kez-kelgen qazaqstandyq «109» qysqa nómiri boıynsha qońyraý shala alady. Sheteldikter myna telefon nómiri boıynsha habarlasa alady: 8 800 300 3535. Bul elordanyń sheteldik qonaqtary úshin call-ortalyǵy. Bul jerde qyzmetkerler qazaq, orys, túrik, aǵylshyn, frantsýz jáne qytaı tilderinde qyzmet kórsetedi», - deıdi Andreı Lýkın.
Sıtýatsııalyq ortalyqty qurýdaǵy negizgi maqsat - kez-kelgen ýaqytta qalanyń barlyq salasy boıynsha tótenshe jaǵdaılarǵa tez arada áreket etý. Bul: kólik, medıtsına, quqyqtyq tártip, kommýnaldy sharýashylyq jáne t.b. salalar.
Sıtýatsııalyq ortalyq Astanada EKSPO-2017 Halyqaralyq mamandandyrylǵan kórmesin ótkizýge baılanysty quryldy. Kórme aıaqtalǵan soń ortalyq óz jumysyn jalǵastyra beredi.
