Reseılikten 90 myń AQSh dollaryna jýyq qarjyǵa baǵalanatyn 9 kelige tarta geroın tárkilendi - QR ІІM
ASTANA. 4 sáýir. QazAqparat - Reseı azamatynan 90 myń AQSh dollaryna jýyq qarjyǵa baǵalanatyn 9 kelige tarta geroın tárkilendi.
Bul týraly búgin Astanada ótken brıfıngte Іshki ister mınıstrliginiń resmı ókil Nurdildá Oraz málim etti.
ІІM Esirtki bıznesine qarsy kúres komıtetiniń qyzmetkerleri Kóliktegi ІІD-niń Esirtki bıznesine qarsy kúres basqarmasy qyzmetkerlerimen birlesip, aýyr esirtki zattaryn temir jol kóligimen jetkizýmen jáne olardy Astana qalasy aýmaǵynda taratýmen aınalysyp júrgen iri esirtki satýshysynyń is-áreketiniń jolyn kesti. Olar qyzmettik ıtterdi paıdalana otyryp, jedel-izdestirý jáne arnaıy is-sharalar ótkizý kezinde Qazaqstan Respýblıkasynda turýǵa yqtııar haty bar Reseı Federatsııasynyń 47 jastaǵy azamatyn ustady.
«Odan 8,8 keliden astam geroın tárkilendi. Sarapshylar alynǵan esirtki zatyn kúre tamyrǵa 44 myń 200-den asa dozada qoldanýǵa bolatynyn jáne onyń quny 13 mıllıonǵa (nemese 88 myń AQSh dollary) baǵalanatynyn atap ótti»,-dedi resmı ókil. Qazirgi ýaqytta onyń Qazaqstan Respýblıkasynda turýdyń zańdylyǵy jáne onyń qylmystyq baılanystaryn anyqtaý boıynsha tekserý is-sharalary júzege asyrylýda.
